Prokuroria pranë Gjykatës së Shkallës së Parë të Juridiksionit të Përgjithshëm në Elbasan ka përfunduar hetimet dhe ka çuar për gjykim shtetasin Donald Hoxha, i akuzuar për vrasjen me paramendim të ish-efektivit të policisë, Roland Rexhepi.
Ngjarja e rëndë ndodhi mëngjesin e 23 korrikut 2009, kur Rexhepi, i njohur me nofkën “Doda”, u ekzekutua me breshëri automatiku, duke gjetur vdekjen e menjëhershme.
Pas një hetimi të gjatë, prokuroria ka arritur në përfundimin se Hoxha është përfshirë në këtë krim, i cili është kryer në bashkëpunim. Ai akuzohet për veprën penale të “Vrasjes me paramendim” të parashikuar nga nenet 78/a dhe 25 të Kodit Penal.
Procedimi penal mbi këtë çështje ka qenë një ndër më të ndërlikuarit, pasi vrasja e ish-oficerit të antidrogës së Elbasanit u pasua nga një seri krimesh të tjera në dy dekadat e fundit.
Ndërsa çështja tashmë është dërguar në gjykim, prokuroria po vijon hetimet për të identifikuar dhe ndjekur penalisht bashkëpunëtorët e tjerë të mundshëm në këtë ekzekutim të bujshëm.
Vrasja e Roland Rexhepit mbetet një nga ngjarjet më të rënda kriminale në Elbasan, duke shënuar një moment kyç në luftën mes grupeve të fuqishme kriminale në këtë qytet.
