Tirana do të përballet me Bylisin sot në orën 13:00 në kuadër të 1/8 të finales së Kupës së Shqipërisë.
Ndeshja do të zhvillohet në stadiumin e Vorës dhe ka një rëndësi të madhe për të dyja skuadrat, që kërkojnë kalimin në çerekfinale të këtij kompeticioni.
Situata për Tiranën është kritike, pasi ekipi më i titulluar në Shqipëri ka pasur vështirësi në Superligë dhe ndodhet në zonën e ftohtë të klasifikimit, pas humbjes së fundit 2-1 ndaj Vllaznisë në Shkodër. Trajneri i skuadrës, Gugash Magani, ka theksuar se presioni mbi ekipin është jashtëzakonisht i madh dhe ka kërkuar që ekipi të shmangë përsëritjen e gabimeve të mëparshme.
“Presioni është i madh. Situata nuk është e mirë, por duhet të jemi shumë të bashkuar. Çunat duhet të jenë të qetë dhe ne duhet të mbajmë presionin mbi vete. Pas humbjes me Vllazninë, e thashë se gabimet ishin tonat. Në këto momente duhet të jemi të fokusuar dhe të përmirësojmë çdo aspekt,” tha Magani para ndeshjes.
Magani gjithashtu theksoi se një nga çështjet kryesore për ekipin është menaxhimi i rezultateve kur ndodhen përpara, siç ndodhi në disa ndeshje të mëparshme, ku Tirana nuk ka arritur të ruajë avantazhin. “Kur jemi 1-0 përpara, duhet të menaxhojmë më mirë rezultatin. Ne e kemi analizuar këtë dhe nuk do të ndodhë më,” shtoi ai.
Pavarësisht situatës aktuale, trajneri Magani është i bindur se ekipi ka potencialin për të përmirësuar situatën dhe për të kaluar këtë fazë të Kupës. “Ne do të luftojmë për të fituar ndeshjen dhe besoj se do ta arrijmë objektivin tonë. Organizimi është duke u përmirësuar dhe shumë shpejt do të jemi të plotësuar në aspektin e organikës,” tha Magani.
Për trajnerin e Tiranës, çdo lojtar ka përgjegjësitë e tij, por ai theksoi se përgjegjësia kryesore është e tij. “Secili ka përgjegjësitë e veta, por përgjegjësia kryesore është e imja. Ne jemi të gatshëm të dalim përpara dhe ta ndihmojmë ekipin të dalë nga ky moment i vështirë,” përfundoi ai.
Tirana e ka të qartë se në këtë moment, Kupa e Shqipërisë është një mundësi e shkëlqyer për të shpëtuar sezonin dhe për të rikthyer shpresat për një tjetër trofe. Pritet një përballje e nxehtë sot, me shpresën që ekipi të rifitojë besimin dhe të vazhdojë më tej në garën për Kupën.
