Në orën 21:00, televizioni “Apollon” do të transmetojë drejtpërdrejt emisionin për diasporën shqiptare, “Na Thërret Atdheu”.
Ky episod vjen me një diskutim të thelluar mbi sfidat dhe perspektivat e diasporës shqiptare për vitin 2024.
Me një panel të ftuarish me përvojë dhe autoritet, debati premton një vështrim të sinqertë dhe të argumentuar mbi temat kyçe që prekin shqiptarët jashtë kufijve të vendit. Të ftuarit përfshijnë Aurora Dollenberg, kryetare e Federatës së Mjekëve Europianë, gazetarin dhe aktivistin Zef Pergega nga SHBA, poetin dhe përkthyesin Llesh Murrani nga Gjermania, si dhe juristin Andi Doko, gjithashtu nga Gjermania.
Diskutimi do të shtrihet në disa aspekte të rëndësishme, duke nisur nga sfidat ekonomike dhe sociale që përballen emigrantët shqiptarë, deri te vlerësimi i angazhimit të qeverisë shqiptare ndaj diasporës gjatë vitit 2024. Pikat kryesore të debatit përfshijnë:
Pyetjet:
- Si e shohin emigrantët shqiptarë në botë këtë vit? Çfarë mendojnë ata për sfidat e vitit që po lëmë pas?
- Për sa i përket Qeverisë, si i ka menaxhuar dhe realizuar ajo premtimet për diasporën?
- Dështim apo sukses e shihni këtë vit? Papunësia, varfëria, emigrimi masiv, rritja e çmimeve, ku çdo artikull është shtrenjtuar?
- A ka besim diaspora shqiptare tek qeverisja? Në ç’nivel ka qenë besueshmëria në vitin që po lëmë pas?
- Si e përkufizoni vështrimin pas në vitin 2024 dhe perspektivën e vitit 2023?
- Si ka qenë Shqipëria e vitit 2024 për diasporën?
- Shqipëria, vendi më i varfër në Ballkan, me njerëz të mëdhenj në pasuri. A ju duken paradoksale këto kontraste të thella të nivelit ekonomik mes shtresave të shoqërisë shqiptare, apo janë normale në kushtet e qeverisjes?
- Në optikën e diasporës, masat dhe reformat që ka ndërmarrë qeveria në vitin 2024, a kanë qenë efektive?
- Periudha kohore që po jetojmë ka shumë paqartësi. Kujt ia adreson diaspora këto paqartësi?
- Në të gjithë botën, qeveritë kanë aplikuar politika strategjike për diasporën e tyre. Qeveria shqiptare në vitin 2024, ndryshe nga vitet e mëparshme, ka shfaqur interes për emigrantët shqiptarë të diasporës. Përse? Për shkak të zgjedhjeve apo për të zhvendosur vëmendjen nga krizat e shumta politike dhe jo vetëm?
- Shqipëria ka bërë hap përpara në drejtim të përmirësimit të klimës për diasporën në vitin 2024, apo të kundërtën?
- Shqipëria në vitin 2024 a ka qenë vend i sigurt për të investuar nga shqiptarët e diasporës?
- Urat e komunikimit mes diasporës dhe Shqipërisë në përmbushjen e kapitujve të integrimit të Shqipërisë në BE.
- Fondi i Zhvillimit të Diasporës, që ka në fokus stimulimin e projekteve të reja, qoftë me financimin e projekteve në Shqipëri, qoftë me diasporën. A ka hedhur hapa përpara?
- Platforma e rrjetëzimit të profesionistëve, të rinjve, të studentëve, dhe të mësuesve të gjuhës shqipe në diasporë, si ka funksionuar në vitin 2024?
- Agjencia Kombëtare e Diasporës, e cila ka kaluar në varësi të Ministrisë së Jashtme dhe financohet nga buxheti i shtetit, donacione dhe burime të tjera të ligjshme, ka për mision zhvillimin dhe thellimin e bashkëpunimit institucional me diasporën përmes përmirësimit dhe mbrojtjes së të drejtave dhe interesave të qytetarëve shqiptarë në vendet ku ata jetojnë. A e ka kryer këtë mision në vitin 2024?
- Agjencia Kombëtare e Diasporës, sa afër apo larg ka qenë me diasporën shqiptare në vitin 2024 për të ofruar ndihmë për ruajtjen e trashëgimisë kulturore kombëtare, si dhe për nxitjen e bashkëpunimit ekonomik ndërmjet vendit të origjinës dhe diasporës?
Përmes një sërë pyetjesh të drejtuara panelistëve, emisioni synon të trajtojë çështje si politika strategjike të qeverisë për diasporën, besueshmëria e kësaj të fundit në qeverisje dhe ndikimi i reformave për ruajtjen e trashëgimisë kulturore kombëtare. Po ashtu, një vëmendje e veçantë do t’i kushtohet Fondit të Zhvillimit të Diasporës dhe platformës së rrjetëzimit profesional, si mjete për të forcuar lidhjet midis Shqipërisë dhe shqiptarëve jashtë kufijve.
“Na Thërret Atdheu” ofron një mundësi të artë për të dëgjuar mendimet e ekspertëve dhe përfaqësuesve të diasporës mbi çështje të rëndësishme që prekin jo vetëm emigrantët, por edhe vetë Shqipërinë. Emisioni do të transmetohet gjithashtu në platformat Tring TV, Abcom, Vodafone IPTV, Live Stream, YouTube dhe Facebook, duke siguruar akses për publikun në Shqipëri, Kosovë dhe disa shtete të Amerikës.
Mos e humbisni këtë diskutim të rëndësishëm, që synon të hedhë dritë mbi marrëdhënien e Shqipërisë me diasporën dhe të përcaktojë rrugët e bashkëpunimit për të ardhmen. “Na Thërret Atdheu” – sonte, ora 21:00!
