Lushnja ka nisur të vishet kuq e zi në prag të festave të 28 dhe 29 Nëntorit, dy datave më të rëndësishme të historisë kombëtare shqiptare.
Atmosfera festive ka përfshirë qytetin, ku flamujt kombëtarë dhe dekorimet kuq e zi po i japin një pamje të veçantë hapësirave publike dhe akseve kryesore të tij.
Bashkia Lushnjë, përmes punës së Ndërmarrjes së Pasurisë Publike, ka nisur vendosjen e dekorimeve festive, duke kontribuar në krijimin e një atmosfere sa më të bukur dhe patriotike për qytetarët.
Punonjësit e ndërmarrjes janë angazhuar në zbukurimin e qytetit me simbolet kombëtare, duke sjellë më shumë ngjyra, gjallëri dhe frymë festive në çdo hapësirë të dekoruar.
Përgatitjet për këto festa nuk do të kufizohen vetëm në dekorimin e qytetit, pasi 28 dhe 29 Nëntori do të shoqërohen edhe me aktivitete të ndryshme festive, kulturore dhe artistike, duke i dhënë qytetit më shumë gjallëri dhe duke bërë bashkë qytetarët në atmosferën e festave kombëtare.
Këto ditë të shënuara, 28 Nëntori, Dita e Pavarësisë, dhe 29 Nëntori, Dita e Çlirimit, mbartin vlera të veçanta historike dhe mbeten simbol i identitetit, sakrificës dhe krenarisë kombëtare.
Lushnja vishet kuq e zi, për të festuar me krenari historinë dhe simbolet tona kombëtare!