Liqeni i “Barunëve” në Krujë po përballet me një rënie të ndjeshme të nivelit të ujit, duke ngritur shqetësime për një situatë të rënduar mjedisore.

Denoncimi është bërë publik këtë të diel, më 4 tetor, nga gazetari dhe ish-kandidati për deputet i Partisë Demokratike, Aulon Kalaja, i cili ka publikuar pamje nga liqeni dhe ka ngritur shqetësimin për rënien e nivelit të ujit.

Sipas tij, banorët e zonës kanë shprehur prej kohësh shqetësimin për këtë situatë, ndërsa pamjet tregojnë qartë ndryshimin e vijës së ujit dhe sipërfaqes së liqenit.

Kalaja pretendon se në disa pjesë rënia e nivelit të ujit ka arritur deri në 7 metra.

Shqetësimi kryesor lidhet me pasojat që mund të ketë kjo situatë në ekosistemin e liqenit. Sipas peshkatarëve dhe banorëve që e njohin zonën, nëse niveli i ujit vazhdon të ulet dhe nuk ka reshje apo ndërhyrje për furnizimin me ujë, rrezikohet edhe fauna ujore.

Frika është veçanërisht për peshqit, të cilët mund të përballen me mungesën e oksigjenit dhe kushteve të nevojshme për mbijetesë në rast të tkurrjes së mëtejshme të rezervuarit.

Por Liqeni i “Barunëve” ka pasur edhe një tjetër rol të rëndësishëm për Krujën.

Në periudhat kur zjarret kanë përfshirë pyjet dhe malet përreth qytetit, helikopterët e angazhuar në operacionet e shuarjes së flakëve janë furnizuar me ujë pikërisht nga ky liqen.

Sot, i njëjti burim uji që ka ndihmuar në përballimin e emergjencave të zjarreve, përballet me një rënie të fortë të nivelit.

Banorët kërkojnë vëmendje dhe ndërhyrje, ndërsa mbetet për t’u parë nëse situata do të përmirësohet me reshjet apo do të kërkojë masa të tjera për mbrojtjen e këtij ekosistemi.