Kryeministri Edi Rama ka reaguar sërish ndaj kërkesës së gjyqtarëve për rritje pagash, duke e cilësuar qëndrimin e Shoqatës së Gjyqtarëve si të papranueshëm dhe të paprecedentë në historinë e Europës. Në një komunikim për mediat, kreu i qeverisë u shpreh se është “absolutisht i surprizuar” nga ajo që e konsideroi një përpjekje për t’i imponuar Kuvendit dhe qeverisë vendime përmes pushtetit gjyqësor.

“S’mund të thuash topi është i imi, topin do ta gjuaj vetë dhe porta duhet të jetë bosh. Regjistrohuni si parti dhe shpalosni platformën tuaj nëse doni. Ju zotërinj kërkoni 37 milionë euro nga buxheti i shtetit. Kjo është e vërteta dhe se luan topi. Se për çfarë jemi ne në Gjykatën Kushtetuese me ju, ta dinë shqiptarët. Ju kërkoni që për gjyqtarin e Apelit, rroga nga 3480 euro, të shkojë në mbi 5000 euro”, deklaroi Rama.

Kryeministri shtoi se kjo është hera e dytë që, sipas tij, shoqata e gjyqtarëve përpiqet të reagojë politikisht, duke përdorur një gjuhë që ai e cilësoi të papranueshme për përfaqësuesit e pushtetit gjyqësor. Sipas Ramës, gjyqtarët duhet të shprehen përmes vendimeve në sallën e gjyqit dhe jo përmes deklaratave publike.

Ai theksoi se SPAK nuk i është bashkuar kësaj kërkese, duke e veçuar atë nga pjesa tjetër e sistemit. “Për SPAK e veçoj, se nuk i është bashkuar kësaj kërkese absurde, për ta çuar pagën 9800 euro”, u shpreh Rama.

Sipas kryeministrit, gjyqtarët aktualisht paguhen në nivele të krahasueshme me vendet e rajonit, përfshirë Greqinë, dhe kërkesa për rritje pagash me 2–3 mijë euro në muaj nuk ka bazë ligjore apo kushtetuese. Ai theksoi se çështja është tashmë në shqyrtim në Gjykatën Kushtetuese.