KUMANOVË – Një seri zjarrvëniesh të qëllimshme tronditën qytetin e Kumanovës në orët e para të mëngjesit të sotëm, duke dëmtuar prona private dhe publike.
Ngjarjet e rënda përfshijnë djegien e një lokali afarist, disa automjeteve dhe pjesërisht të një shtëpie.
Një nga objektet e përfshira në zjarr është një zyrë për kontabilitet dhe përkthime gjyqësore, e vendosur përballë Gjykatës Themelore të Kumanovës. Ky biznes rezulton të jetë në emrin e Fitor Jakupit, këshilltar në Kuvendin Komunal të Kumanovës. Autoritetet dyshojnë se zjarri është vënë qëllimisht.
Pak metra më larg, në lokalitetin Garnizon, zjarrvënësit kanë sulmuar makinën e prokurorit të lartë Xhelal Bajrami. Fotografitë nga vendi i ngjarjes tregojnë se automjeti mund të jetë djegur me koktej molotovi, pasi pranë tij janë gjetur disa shishe që ngjallin këtë dyshim.
Një tjetër sulm është regjistruar ndaj makinës së një koloneli me inicialet E.D. Ndërsa mjeti i tij u përfshi pjesërisht nga flakët, dëmet ishin të kufizuara dhe pa pasoja të mëdha. Nga këto zjarrvënie, u dëmtua gjithashtu fasada e një shtëpie në zonë, por ndërhyrja e zjarrfikësve arriti ta lokalizonte zjarrin pa përhapje të mëtejshme.
Sipas informacioneve jozyrtare, në të gjitha lokacionet e përfshira nga zjarrvëniet nuk funksiononin kamerat e sigurisë në momentin e sulmeve. Hetuesit dyshojnë se autorët mund të kenë përdorur pajisje bllokuese për kamerat e sigurisë ose sinjalet e internetit, duke bërë të pamundur regjistrimin e ngjarjeve.
Prokurorët e çështjes kanë dalë në vendngjarje për të mbledhur prova, ndërsa disa nga makinat e dëmtuara janë sekuestruar për hetime të mëtejshme.
Ky zinxhir ngjarjesh ka ngritur shqetësime mbi sigurinë në qytet, ndërsa autoritetet po hetojnë për të zbuluar autorët dhe motivet pas këtyre sulmeve. Për momentin, mbetet e paqartë nëse këto zjarrvënie janë të lidhura mes tyre ose janë akte të izoluara.
Banorët e Kumanovës shprehin shqetësim për ngjarjet dhe kërkojnë nga autoritetet të shtojnë masat e sigurisë, ndërsa zjarret vazhdojnë të jenë objekt hetimi intensiv nga autoritetet vendore.
