Një tjetër episod përplasjesh verbale është shtuar sot mes kryebashkiakut të Tiranës, Erion Veliaj, dhe Drejtoria e Përgjithshme e Burgjeve, pas shtyrjes së seancës paraprake gjyqësore që ishte parashikuar të mbahej gjatë ditës së sotme.

Seanca u shty për më 19 janar, ndërsa në media u raportua se shkak për moszhvillimin e saj ishte fakti që Veliaj nuk u shoqërua në kohë nga paraburgimi drejt gjykatës. Vetë kryebashkiaku pretendoi se ishte “harruar” në qeli nga autoritetet.

Por këto pretendime janë hedhur poshtë kategorikisht nga Drejtoria e Përgjithshme e Burgjeve, e cila përmes një deklarate zyrtare për shtyp sqaron se shërbimet e Policisë së Burgjeve kanë vepruar sipas orarit dhe procedurave.

Sipas Drejtorisë së Burgjeve, mjetet e Policisë së Burgjeve kanë qenë të pranishme në ambientet e IEVP-së Durrës në kohën e parashikuar për transferimin e Veliajt drejt seancës gjyqësore. Në momentin e njoftimit për nisje, thuhet se vetë shtetasi E.V. ka refuzuar të dalë, duke pretenduar se mjeti i Policisë së Burgjeve ishte vonuar.

Institucioni thekson se për çdo vonesë apo ndryshim të orarit të seancave gjyqësore, kancelaria e gjykatës njoftohet zyrtarisht, dhe se nga ana e Policisë së Burgjeve nuk ka pasur asnjë pengesë për zhvillimin normal të procesit gjyqësor.

“Pretendimet se shtetasi Erion Veliaj është ‘harruar’ në qeli janë të pavërteta. Forcat tona kanë qenë në kohë dhe kanë njoftuar në përputhje me procedurat. Refuzimi për të dalë ka ardhur nga vetë shtetasi,” thuhet në deklaratën zyrtare.

Reagimi i Drejtorisë së Burgjeve vjen pas deklarimeve publike dhe reagimeve politike të ditës, duke shtuar më tej tensionin rreth çështjes penale të kryebashkiakut të Tiranës dhe mënyrës se si po administrohet procesi gjyqësor.

Ndërsa seanca e radhës është shtyrë, përplasja e deklaratave mes palëve ka hapur edhe një herë debatin publik: ishte neglizhencë institucionale apo refuzim i qëllimshëm për të dalë nga qelia? Pyetje që, për momentin, mbetet në nivel deklaratash, por që rëndon më tej klimën politike dhe gjyqësore rreth dosjes Veliaj.