Në qendër të Fierit, nën sheshin kryesor, funksionon prej vitesh nje parking publik i bashkisë. Çdo qytetar që hyn me makinë aty, merr në dorë një copë letër të vogël: një biletë me datë, orë, një numër dhe një QR-kod. Ajo duket si një dokument zyrtar, një dëshmi e shërbimit, një provë pagese.
Kur shkon tek sporteli, ua jep kete bilete cunave qe punojne atje, te cilet e skanojne dhe ne baze te sasise se kohes ben edhe pagesen. Kur jep leket, nuk merr fature.
Por edhe ajo bileta hyrese nuk është faturë tatimore.
I pytur nga TV Apollon, nje ekspert fiskalizimi qe nuk deshiron te identifikohet thote:
“Po, nuk të japin faturë tatimore. Kjo nuk është tatimore. QR-codi është për sistemin e brendshëm të tyre.”
Në pamje të parë, kjo mund të duket thjesht si një praktikë informale. Por në fakt, është zemra e një skandali të rëndë financiar, i cili çoi në masat e arrestit shtëpiak për ish-nënkryetaren e Bashkisë Fier, Adela Hysenaj, pezullimin e dy drejtorëve dhe ndalimin për të dalë jashtë vendit për një sërë zyrtarësh të tjerë.
Arsyeja? Prokuroria e Fierit, midis te tjerava zbuloi se parkingu publik i Fierit funksiononte për vite të tëra pa faturë fiskale, duke i shkaktuar bashkisë një dëm prej 422 mijë eurosh.
Por pse ajo letër që qytetarët marrin kur hyjnë… nuk quhet faturë?
Dhe pse, megjithëse disa zyrtare u futën në telashe me ligjin, parkingu ende sot vazhdon të mos lëshojë faturë tatimore?
Se pari te biem dakort se cfarë është një faturë tatimore?
Sipas ligjit për fiskalizimin, një faturë tatimore nuk është një letër e thjeshtë, por një dokument i standardizuar që duhet të përmbajë:
• Titullin “FATURË”
• Emrin e tregtarit : ne rastin tone Bashkia Fier
• NIPT-in : NIPT te ndermarrjes publike nen te cilen operon parking
• Adresën e saktë
• Përshkrimin e shërbimit (në këtë rast: parking)
• Sasinë dhe vlerën
• Mënyrën e pagesës
• Elementet e sigurisë, që janë:
o NSLF – Numri i Sigurisë së Lëshuesit të Faturës
o NIVF – Numri Identifikues i Veçantë i Faturës
Këto dy kode janë zemra e fiskalizimit.
Çfarë është NSLF?
Sipas ligjit:
“NSLF është një numër alfanumerik i veçantë, i papërsëritshëm, i gjeneruar nga sistemi i tatimpaguesit, që konfirmon lidhjen ndërmjet lëshuesit dhe faturës.”
Pra, është vula dixhitale e subjektit që lëshon faturën.
Çfarë është NIVF?
Po ashtu ligji sqaron:
“NIVF gjenerohet nga sistemi informatik i administratës tatimore qendrore, nëse përmbushen të gjitha kontrollet gjatë verifikimit të faturës.”
D.m.th., vërtetimi zyrtar se fatura është deklaruar në tatime në kohë reale.
Nëse një dokument nuk ka NSLF dhe NIVF, ai nuk është faturë fiskale.
Çfarë ndodh në parkingun e Fierit?
Dokumenti që qytetarët marrin:
• nuk ka titull “FATURË”
• nuk ka emër subjekti
• nuk ka NIPT
• nuk ka vlerë
• nuk ka përshkrim shërbimi
• nuk ka NSLF
• nuk ka NIVF
Thjesht një:
FIER PARKING
28.11.2025 – ora: 12: 30
Një QR-kod i brendshëm
Një numër hyrjeje
Një dokument i tillë, sipas ekspertëve, nuk klasifikohet as si faturë tatimore, as si faturë e thjeshtë. Është thjesht një biletë teknike, për sistemin e brendshëm të parkingut.
Dhe sipas ligjit, në momentin që qytetari paguan, duhet të marrë faturë fiskale.
Në Fier, kjo nuk ndodh.
Skandali qe plas kete verë – dhe akuzat e rënda
Në korrik, Prokuroria e Fierit publikoi rezultatet e një hetimi 6-mujor. U zbulua se parkingu publik mbledhte para, por nuk deklaronte të ardhura.
Dëmi total: 422 mijë euro.
Të akuzuarit:
• A.H, ish-nënkryetare e Bashkisë Fier
Arrest shtëpie – akuza: shpërdorim detyre, ndikim i paligjshëm
• V.C, drejtor I hetimit tatimor
Arrest shtëpie – akuza: shpërdorim detyre
• A.C, drejtoreshë e taksave vendore
Pezullim nga detyra
• M.D, sekretar i përgjithshëm
Pezullim nga detyra – akuza: ndikim i paligjshëm
Sipas prokurorisë:
• nuk u vendos pajisja fiskale në parking
• tarifat për disa subjekte u ulën nën vlerën zyrtare
• të ardhurat nuk u deklaruan
• nuk u lëshuan fatura
• u shmangën taksa në mënyrë të qëllimshme
Por sot? Pse parkingu vazhdon pa faturë fiskale?
Këtu nis pjesa më shqetësuese e historisë.
Pavarësisht hetimit, pavarësisht arrestimeve, pavarësisht dëmit financia sistemi nuk ka ndryshuar.
Qytetarët marrin të njëjtën letër si më parë.
E njëjta biletë.
Asgjë nuk ka ndryshuar në praktikë.
Pyetja e madhe mbetet:
Ku shkojnë paratë që paguhen sot në parkingun e Fierit?
Dhe më e rëndë:
Kush mban përgjegjësi për vijimin e mosfiskalizimit pas skandalit?
Administrata Tatimore?
Bashkia?
Menaxheri i parkingut?
Ndërmarrja e Taksave?
Apo dikush tjetër?
Asnjë institucion nuk ka dhënë shpjegim publik.
Përfundimi: Letra që flet më shumë sesa duket
Bileta e bardhë e parkingut të Fierit, një copë letër me një QR të padobishëm fiskalisht, është simbol i një problemi më të thellë sesa një parkim që nuk lëshon faturë.
Ajo përfaqëson:
• mungesën e transparencës
• dështimin e zbatimit të ligjit
• një sistem të deformuar qe nuk I trembet ndeshkueshmerise dhe që vazhdon edhe pas hetimeve
• një model të ardhurash që s’dihet ku përfundon
• një pikëpyetje të madhe për llogaridhënien institucionale
Në një kohë kur qytetarët paguajnë për çdo gjë me faturë, parkimi publik i një bashkie të madhe sic eshte ajo e firet nuk jep faturë.
Derisa në duart e qytetarëve të Fierit të mos dalë një faturë e vërtetë, me:
• FATURË
• NIPT
• NSLF
• NIVF
• VLERËN
• SHËRBIMIN
Ky skandal nuk mund të quhet i mbyllur. Po tani qe nuk eshte me Adela, kush kush do te “behet” koke turku?
