Gjatë mbledhjes së Komisionit të Ekonomisë, ku u diskutua projektligji “Për parandalimin e konfliktit të interesave në ushtrimin e funksioneve publike”, deputeti i Partisë Socialiste, Erion Braçe, kërkoi që në procesin e kontrollit të pasurisë të përfshihen edhe drejtuesit e Tatimeve dhe Doganave.
Ai u shpreh se kufizimet për deputetët duhet të ekzistojnë, por nuk duhet të shkojnë në ekstrem për sa kohë ata deklarojnë të ardhurat në mënyrë të rregullt. Braçe theksoi se disa kategori funksionarësh me përgjegjësi të larta financiare nuk janë të përfshira në ligjin aktual për kontrollin e pasurive dhe se kjo situatë duhet korrigjuar.
Sipas tij, roli i deputetit nuk mund të barazohet me atë të drejtuesve të institucioneve ekzekutive, të cilët menaxhojnë tendera, fonde dhe vendimmarrje të ndjeshme. Ai apeloi që periudha e ndalimit pas largimit nga detyra të mos jetë uniforme për të gjitha pozicionet, por të përshtatet me përgjegjësinë dhe ekspozimin e secilit funksion.
Braçe ngriti gjithashtu shqetësimin për disa përcaktime të projektligjit që, sipas tij, mund të krijojnë paqartësi në vlerësimin e stilit të jetesës dhe të deklarimit të pasurisë. Ai solli si shembull diferencat e mëdha në çmimet e veshjeve apo mallrave të tjera, duke theksuar se këto elemente nuk mund të përdoren si kritere të vetme për të ngritur dyshime mbi mënyrën e jetesës.
Në diskutim ai riktheu çështjen e deputetëve që zotërojnë tokë apo biznese familjare në zonat rurale, duke theksuar se nuk mund t’u ndalohet të administrojnë pasuritë e tyre për sa kohë nuk keqpërdorin funksionin publik.
Braçe përmbylli deklaratën duke kërkuar trajtim të barabartë të të gjitha kategorive të zyrtarëve që mbajnë përgjegjësi të larta financiare: “Të gjithë fokusohen tek deputeti, por drejtuesit me kompetenca ekzekutive nuk mund të mbeten jashtë kontrollit të pasurisë.”
