Niveli i Vjosës ka nisur të ulet ndjeshëm dhe autoritetet parashikojnë orë të qeta gjatë natës, ndërsa vijojnë monitorimin për çdo zhvillim të mundshëm në Levan e Novoselë.
Qendra Operacionale e Emergjencave Civile në bashkinë Fier vijon të punojë në gatishmëri të plotë, edhe pse rreziku kryesor i përmbytjeve konsiderohet i tejkaluar. Kështu është shprehur kryebashkiaku Armando Subashi, i cili ka dhënë detaje të fundit mbi situatën e Vjosës.
Ai ka sqaruar se matjet nga hidromatësi në Memaliaj tregojnë një ulje të vazhdueshme të nivelit të ujit. Sipas tij, pikun e prurjeve lumi e regjistroi rreth orës 14:30, kur u arrit niveli 7, një tregues që parashikon mbërritjen e këtij fluksi në zonat e ultësirës mes orës 19:00 dhe 20:00.
Subashi theksoi se përvoja e viteve të kaluara tregon se ky nivel nuk përbën rrezik për daljen e Vjosës nga shtrati në zonat e Levanit dhe Novoselës. Kjo ka sjellë një qetësim të ndjeshëm të situatës në terren.
Ai shtoi se rënia e ujit është më e dukshme në segmentin Tepelenë–Memaliaj, ku niveli ka zbritur me rreth 70–80 centimetra krahasuar me mesditën. “Ky është tregues i qartë se rreziku ka kaluar,” u shpreh kreu i bashkisë.
Megjithatë, pavarësisht përmirësimit, strukturat e emergjencës do të vijojnë të qëndrojnë në gatishmëri për disa orë të tjera. Mjetet dhe forcat do të mbeten të pozicionuara pranë zonave më të ekspozuara për t’u reaguar menjëherë nëse paraqitet ndonjë situatë e papritur.
Subashi nënvizoi se monitorimi nuk do të ndërpritet gjatë natës, për të garantuar sigurinë e banorëve dhe për të shmangur çdo risk të mbetur. Ai siguroi se qytetarët do të kenë një natë të qetë, ndërsa autoritetet mbeten në detyrë.
Ndërkohë, ekipi i emergjencave vazhdon komunikimin e rregullt me strukturat lokale dhe hidrometeorologjike për të marrë informacion të përditësuar në kohë reale.
Kryebashkiaku theksoi edhe një herë se, falë rënies së nivelit të ujërave në burim, rreziku i përmbytjeve në zonën e Fierit ka kaluar pothuajse plotësisht. Ai u shpreh se aktualisht nuk pritet asnjë problematikë e rëndësishme.
Gjithsesi, forcat e terrenit do të qëndrojnë të angazhuara deri në stabilizimin e plotë të situatës, me qëllim garantimin e sigurisë së banorëve dhe pronave të tyre.
