Në një intervistë prekëse për emisionin “Të Paekspozuarit”, Ëngjëll Cani, babai i Martin Canit, rrëfeu momentet e para të tmerrshme kur mësoi se djali i tij ndodhej në spital pas një incidenti tragjik në shkollë.
Ajo që fillimisht dukej si një situatë e rëndë, përfundoi me lajmin që Martini nuk mbijetoi, duke e lënë familjen dhe komunitetin të shkatërruar nga dhimbja.
“Mësuesja më tha që Martini ishte te ‘Trauma’. Kur arrita atje, më njoftuan që ishte në sallën e operacionit. Fillimisht, mendova se kishte një plagë të vetme, por më pas mësova që plaga ishte e rëndë. Kur më thanë se i kishte prekur zemrën dhe ai nuk mbijetoi, bota më ra përmbi kokë,” tha babai me zërin e mbushur me dhimbje.
Martini, përshkruar nga të gjithë si një djalë shembullor dhe i dashur, ishte i njohur për humorin dhe lidershipin e tij natyral. “E donte e gjithë shkolla, e gjithë lagjja. Ishte një lider i vërtetë. Nuk kam fjalë ta përshkruaj Martinin tim,” u shpreh ai.
Duke folur për autorin e krimit, Ëngjëlli tha se nuk e njeh dhe se deri më tani nuk ka marrë asnjë ngushëllim nga familja e tij. “Ndoshta nuk kanë kurajo ose mund të ndihen fajtorë. Çdo prind nuk e do që djali i tij të bëhet kriminel, por ajo dorë më mori jetën e djalit tim, ëndrrat e tij,” tha ai.
Tragjedia e Martinit ka ngritur shqetësime serioze për sigurinë në shkolla dhe për rolin e institucioneve në parandalimin e ngjarjeve të tilla. “Nëse kjo do të ndodhte në një vend tjetër, jo vetëm që do të dorëhiqej ministri, por do të rrëzohej e gjithë qeveria,” deklaroi Cani, duke theksuar mungesën e masave parandaluese.
Ai falënderoi njerëzit që i kanë qëndruar pranë në këtë kohë të vështirë, por gjithashtu theksoi se dhimbja është e pashmangshme. “Të gjithë ata që më kanë respektuar, më kanë ngrënë një lugë të vogël helmi që unë po ha çdo ditë,” tha ai me një ton që përziente mirënjohjen dhe trishtimin.
Në përshkrimin e takimit të fundit me Martinin, Ëngjëlli kujtoi ëndrrat e tij për t’u bërë futbollist i Kombëtares. “Më tha se kishte luajtur shumë mirë në një ndeshje dhe ëndërronte të bëhej si Cristiano Ronaldo ose Mario Mitaj. Flinte me topin dhe e donte futbollin me gjithë zemër,” kujtoi babai me dhimbje.
Kjo ngjarje tragjike ka prekur jo vetëm një familje, por një komunitet të tërë, duke lënë një boshllëk të madh dhe një thirrje për reflektim. Humbja e Martinit është një kujtesë e dhimbshme se siguria në shkolla dhe mbrojtja e fëmijëve duhet të jenë prioritet absolut.
