Turistët gjermanë e francezë po zgjerohen me shpejtësi në Shqipëri, duke sfiduar dominimin tradicional të italianëve dhe duke ndryshuar hartën e preferencave turistike në vend.
Në rrugët e Tiranës, por edhe në qytete të tjera bregdetare e malore, këtë vit shihen gjithnjë e më shumë të rinj gjermanë e francezë, të ngarkuar me çanta shpine dhe të akomoduar në apartamente me qira. Ata frekuentojnë baret, restorantet dhe zonat turistike, duke sjellë një frymë të re në turizmin shqiptar.
Të dhënat e INSTAT tregojnë se hyrjet nga Gjermania në periudhën janar–korrik arritën në 231 mijë, një rritje prej 28% krahasuar me një vit më parë, ose 50 mijë turistë më shumë. Ky progres e ka çuar Gjermaninë për herë të parë në vendin e gjashtë të listës së tregjeve kryesore turistike për Shqipërinë. Operatorët turistikë theksojnë se pjesa më e madhe e tyre janë vizitorë individualë dhe të rinj.
Franca ka shënuar një rritje edhe më të fortë, me 160 mijë hyrje gjatë së njëjtës periudhë, një rritje prej 48% ose 51 mijë turistë më shumë. Kjo e ka ngjitur Francën në vendin e nëntë në renditje, ndërsa vetëm në korrik hyrjet u rritën me 55%. Shumë operatorë shqiptarë po negociojnë tashmë marrëveshje për të siguruar grupe franceze edhe për vitin e ardhshëm.
Megjithatë, italianët vazhdojnë të jenë grupi i dytë më i madh i vizitorëve në vend, me 664 mijë hyrje në janar–korrik dhe një rritje modeste prej 4.5%. Kjo është shumë larg ritmit 47% të vitit të kaluar, duke sinjalizuar një ftohje të interesit krahasuar me vitet e mëparshme.
Në total, Shqipëria priti 6.58 milionë vizitorë të huaj në shtatëmujorin e parë të vitit, një rritje prej 3.5% krahasuar me një vit më parë, ndjeshëm më e ulët se zgjerimi 23% i së njëjtës periudhë në 2024. Edhe muaji korrik tregoi ngadalësim, me vetëm 0.4% më shumë hyrje se korriku i vitit të kaluar.
Kosovarët mbeten grupi më i madh i vizitorëve, me 35% të totalit, ndonëse në rënie të lehtë. Nga ana tjetër, hyrjet nga Turqia, Polonia dhe Spanja kanë shënuar rënie, ndërsa vizitorët nga Serbia po rikthehen. Në këtë panoramë të re, gjermanët dhe francezët po e konsolidojnë rolin si tregje turistike në rritje për Shqipërinë.
