Prezantuesi legjendar italian Pippo Baudo u nda nga jeta në moshën 89-vjeçare, duke lënë pas një trashëgimi të pashlyeshme në botën e spektaklit dhe kulturës televizive.

Pippo Baudo, një nga emrat më të mëdhenj të ekranit italian, u shua dje në moshën 89-vjeçare. Karriera e tij e jashtëzakonshme zgjati më shumë se gjashtë dekada, duke e shndërruar në një ikonë të pazëvendësueshme të televizionit dhe spektaklit.

Ai njihet si njeriu që e drejtoi Festivalin e Sanremos plot 13 herë, duke krijuar skena të paharrueshme dhe duke zbuluar talente të shumta që më vonë do të shndërroheshin në emra të njohur të muzikës italiane. Për publikun shqiptar, Baudo mbeti gjithashtu një figurë e dashur që e afroi Italinë edhe më pranë.

I lindur më 7 qershor 1936 në Siçili, Baudo fillimisht ndoqi studimet për Jurisprudencë, por pasioni i tij i vërtetë ishte arti. Debutimin e pati në vitin 1959 në konkursin muzikor “La conchiglia d’oro” në Palermo. Vetëm pas disa tentativash dhe audicionesh të përsëritura, ai arriti të siguronte vendin e tij në televizion.

Në vitin 1966 iu besua drejtimi i një kuizi muzikor, duke shënuar kthesën vendimtare në karrierë. Vetëm dy vjet më pas, ai debutoi në Festivalin e Sanremos, duke nisur një lidhje të fortë e të gjatë me këtë skenë. Më 1987 ai kaloi në Mediaset pas ftesës së drejtpërdrejtë nga Silvio Berlusconi, ndërsa në vitin 2002 u rikthye fuqishëm në Sanremo.

Ai vazhdoi të mbetej aktiv edhe në dekadat e fundit, duke drejtuar emisione të rëndësishme si “Domenica In” dhe duke u rikthyer disa herë në skenën e Sanremos, madje edhe përkrah emrave të njohur si Michelle Hunziker, Piero Chiambretti, Bianca Guaccero e Andrea Osvart. Për Pippo Baudo, skena ishte pjesë e jetës së tij deri në fund.

Pavarësisht moshës së thyer, ai nuk e humbi kurrë dëshirën për të qëndruar pranë publikut. Do të kujtohet si një figurë ikonike që i dha televizionit italian një shpirt të ri dhe që mbeti gjithmonë një shembull për pasionin, përkushtimin dhe dashurinë ndaj artit.