Një 14-vjeçar humbi jetën pas një konflikti me thika në një lokal në fshatin Pirg, ndërsa autori i dyshuar ndodhet në spital nën mbikëqyrjen e policisë.
Pasditen e sotme, fshati Pirg në Maliq u përfshi nga një ngjarje e rëndë që ka lënë komunitetin në tronditje. Dy të mitur 14-vjeçarë janë përfshirë në një konflikt të dhunshëm brenda një lokali, ku si pasojë njëri prej tyre humbi jetën.
Sipas burimeve nga policia, ngjarja ndodhi rreth orës 17:30, kur një debat mes dy adoleshentëve degjeneroi në përdorimin e një mjeti prerës. Goditjet fatale me thikë i mori shtetasi E. Xh., i cili u dërgua me urgjencë në spital, por mjekët nuk mundën t’i shpëtonin jetën.
Autori i dyshuar i plagosjes vdekjeprurëse është gjithashtu 14 vjeç dhe ndodhet në spital për të marrë trajtim mjekësor, ndërkohë që mbahet nën vëzhgim të rreptë nga forcat e rendit.
Policia ka shoqëruar disa dëshmitarë dhe po punon për të rindërtuar moment pas momenti zhvillimet që çuan në këtë përplasje tragjike. Ndërkohë, grupi hetimor i ngritur nga Prokuroria po mbledh prova dhe dëshmi për të përcaktuar motivet e saktë të konfliktit.
Ngjarja ka ngjallur shqetësim të madh mes banorëve të zonës, të cilët kërkojnë më shumë vëmendje ndaj sjelljeve problematike të të rinjve dhe masave parandaluese për të shmangur episode të tilla.
Autoritetet lokale dhe organet e drejtësisë kanë premtuar një hetim të plotë, duke theksuar se asnjë detaj nuk do të lihet pa u sqaruar.
