Deputetja e Partisë Demokratike, Ina Zhupa, ka reaguar me forcë ndaj Partisë Socialiste, duke kërkuar që materialet zgjedhore në zyra elektorale të PS në Delvinë të hiqen menjëherë. Sipas saj, kjo zyrë ka shkelur hapur ligjin zgjedhor, një shkelje që është konfirmuar dhe nga Komisioni Qendror i Zgjedhjeve. KQZ ka dhënë të drejtë në denoncimin që ka bërë PD dhe ka kërkuar largimin e materialeve propagandistike nga zyra e PS.
Në një deklaratë të fortë, Zhupa e shoqëruar nga kryetari i PD në Delvinë, Erigers Hamiti, ka theksuar se ky veprim i Partisë Socialiste është një shkelje e qartë e ligjit dhe nuk mund të kalojë pa u ndëshkuar. “Kandidati i PS na tha që do të dilnim bllof. Nuk dolëm aspak bllof – dhe si gjithmonë, kemi të drejtë,” ka shtuar Zhupa.
Ndërkohë, deputetja e PD ka komentuar edhe një nga deklaratat e kandidatit socialist për Delvinën, i cili e krahasoi qytetin me Trojën. Zhupa e ka cilësuar këtë krahasim si ironik, duke theksuar se Delvina dikur ishte një qytet i gjallë, i zhvilluar, dhe simbol i një jete aktive, por që tashmë është shkatërruar nga 12 vite qeverisje socialiste. Ajo ka përmendur se falë një reforme territoriale të dështuar, qyteti është zbrazur nga institucionet, bizneset, dhe rinia.
“Delvina ishte dikur madhështore, kishte institucione, rini dhe biznese. Sot, falë një reforme territoriale të dështuar, është zbrazur nga gjithçka. Institucionet janë larguar, bizneset kanë dështuar dhe rinia është detyruar të largohet,” ka deklaruar Zhupa, duke kritikuar qeverisjen e deritanishme dhe pasojat që ka sjellë për këtë qytet.
Në një apel drejtuar qytetarëve të Delvinës, Zhupa ka theksuar rëndësinë e zgjedhjeve të 11 majit, të cilat janë, sipas saj, një mundësi për të kthyer dinjitetin e humbur dhe për të ringjallur qytetin nën drejtimin e Partisë Demokratike dhe Aleancës për Shqipërinë Madhështore. Ajo ka bërë thirrje për një mbështetje të fortë nga qytetarët për të ndryshuar drejtimin e Delvinës dhe për të filluar një kapitull të ri për qytetin.
