Flakët në Synej të Rrogozhinës vijojnë pa ndërprerje, ndërsa avionë dhe forca tokësore luftojnë për shuarjen e tyre që prej mbrëmjes së djeshme.
Zjarri i nisur në Synej të Rrogozhinës nuk është vënë ende nën kontroll, pavarësisht përpjekjeve të pandërprera të forcave zjarrfikëse dhe banorëve.
Që nga orët e para të mëngjesit, në operacion është angazhuar edhe një avion zjarrfikës ‘Canadair’, i ardhur posaçërisht nga Kroacia për të ndihmuar në shuarjen e flakëve.
Forcat në terren raportojnë se era e fortë po e vështirëson ndërhyrjen, duke përhapur zjarrin në disa drejtime dhe duke rrezikuar edhe zonat e banuara pranë.
Autoritetet lokale u kanë bërë thirrje banorëve të ruajnë qetësinë dhe të bashkëpunojnë me ekipet e emergjencës për të shmangur çdo rrezik për jetën.
Sipas informacioneve të para, nuk raportohen të lënduar, por dëmet materiale pritet të jenë të konsiderueshme, veçanërisht në sipërfaqet pyjore dhe tokat bujqësore.
Operacioni për shuarjen e zjarrit pritet të vijojë edhe gjatë ditës, ndërsa situata do të vlerësohet në mënyrë të vazhdueshme nga autoritetet kompetente.
