Nga fillimi i vitit 2025 deri tani, 50 mijë hektarë tokë janë shkatërruar nga zjarret, duke kaluar shifrat e vitit të kaluar
Shqipëria po përballet me një situatë alarmante zjarresh, ku vetëm në gjysmën e parë të vitit 2025 janë djegur 50 mijë hektarë tokë. Të dhënat janë bërë publike nga Sistemi Europian i Informacionit për Zjarret në Pyje, duke sinjalizuar një rritje të ndjeshme krahasuar me vitin 2024.
Sipas statistikave, gjatë kësaj periudhe janë regjistruar 93 vatra zjarresh, të cilat kanë shkatërruar mijëra hektarë pyje, kullota dhe toka bujqësore. Shifrat tregojnë se dëmet e këtij viti kanë kaluar edhe totalin e një viti më parë, kur u dogjën 46,6 mijë hektarë nga 168 zjarre në të gjithë vendin.
Historikisht, Shqipëria ka pasur disa sezone të rënda zjarresh. Rekordet negative mbeten në vitin 2007 me 127 mijë hektarë të djegur, në vitin 2011 me 54 mijë hektarë dhe në vitin 2012 me 53 mijë hektarë të shkatërruar nga flakët.
Ekspertët dhe autoritetet e mbrojtjes nga zjarret theksojnë se një pjesë e konsiderueshme e vatrave kanë qenë të qëllimshme, duke ngritur pikëpyetje mbi motivet dhe masat parandaluese të pamjaftueshme. Në shumë raste, terrenet e vështira dhe temperaturat e larta kanë vështirësuar ndërhyrjen.
Dëmet e shkaktuara janë të mëdha, jo vetëm në pasuritë natyrore por edhe në ekonomi. Humbja e pyjeve dhe kullotave ndikon drejtpërdrejt te biodiversiteti, bujqësia dhe turizmi, duke rrezikuar edhe jetesën e komuniteteve lokale.
Situata është bërë edhe më tragjike nga fakti se flakët kanë marrë edhe jetë njerëzish. Rasti më i rëndë është ai i shënuar në Gramsh, ku një person humbi jetën si pasojë e zjarreve.
Autoritetet pritet të intensifikojnë fushatat e ndërgjegjësimit dhe të rrisin masat parandaluese, ndërsa specialistët kërkojnë që kjo krizë të trajtohet me përparësi kombëtare për të shmangur përsëritjen e tragjedive të ngjashme.
