Zjarri në Malin e Shpiragut vijon të përhapet me shpejtësi, duke djegur sipërfaqe të mëdha, ndërsa drejtuesit lokalë mungojnë në terren
Një vatër e fuqishme zjarri ka shpërthyer këtë të enjte në Malin e Shpiragut, konkretisht në zonën e Grykës së Murrizit, pranë fshatit Konisbalte. Flakët u përhapën me ritme të shpejta që në orët e paradites, të favorizuara nga era dhe terreni i thyer malor, raporton gazetari Ndriçim Gjoshi.
Mali i Shpiragut shtrihet në territorin e dy bashkive, Berat dhe Dimal, dhe aktualisht zjarri po avancon drejt të dyja zonave administrative. Pavarësisht ndërhyrjes së zjarrfikësve, situata mbetet e vështirë për shkak të kushteve të papërshtatshme për ndërhyrje tokësore.
Pamjet e siguruara nga televizioni Apollon tregojnë për një situatë dramatike, ku flakët kanë përfshirë sipërfaqe të tëra me shkurre dhe pyje. Vatrat po zgjerohen në mënyrë të pandalshme, ndërsa mungesa e ndërhyrjes ajrore dhe mjeteve të specializuara po rëndon më tej përballimin e emergjencës.
Strukturat operacionale janë mobilizuar nga të dy bashkitë, por mungesa e koordinimit dhe prezenca e dobët e autoriteteve vendore në terren ka krijuar kaos në menaxhimin e situatës. Qytetarët raportojnë për një reagim të vonuar dhe të papërshtatshëm ndaj rrezikut që po përshkallëzohet.
Zjarri ka përfshirë një sipërfaqe të madhe pyjore, duke rrezikuar biodiversitetin dhe tokat përreth, ndërsa përpjekjet për izolimin e flakëve po bëhen gjithnjë e më të vështira. Autoritetet deri më tani nuk kanë bërë publike një plan të qartë ndërhyrjeje.
Banorët shprehin shqetësim të thellë për pasojat afatgjata që ky zjarr mund të sjellë, jo vetëm në mjedis, por edhe në ekonominë lokale, sidomos në zonat e kultivuara dhe ato të shfrytëzimit pyjor.
Zyrtarët e bashkive të Beratit dhe Dimalit nuk janë parë në vendngjarje, ndërkohë që mungesa e transparencës dhe e komunikimit me publikun po shton indinjatën. Flakët vijojnë të përparojnë në lartësitë e malit, ndërsa rreziku për përhapje më të gjerë mbetet i lartë.
