Një zjarr i fuqishëm ka përfshirë traversa druri pranë hekurudhës Fier-Vlorë, duke shkaktuar re të dendura tymi që mbuluan qytetin dhe rrethinat.
Një vatër e madhe zjarri shpërtheu sot në afërsi të linjës hekurudhore Fier-Vlorë, pranë stacionit dhe disa banesave. Flakët përfshinë një sasi të madhe trarësh druri të përdorur dikur për hekurudhën, duke gjeneruar shtëllunga të mëdha tymi që pushtuan qiellin mbi Fier.
Banorët e shqetësuar, të cilët kanë shtëpitë vetëm disa metra larg zjarrit, lajmëruan menjëherë shërbimin zjarrfikës. Dy mjete të repartit zjarrfikës të Fierit mbërritën në vendngjarje dhe po punojnë intensivisht për shuarjen e flakëve. Pamjet e siguruara nga Apollon Tv tregojnë qartë se banesat ndodhen shumë pranë vatrës, duke e shtuar rrezikun për dëme më të mëdha.
Shkaqet e zjarrit nuk janë konfirmuar ende, por burime nga terreni dyshojnë se bëhet fjalë për zjarrvënie të qëllimshme. Terreni i përfshirë në flakë ndodhet pranë një zone ku, pas rikonstruksionit të hekurudhës, traversat prej druri ishin lënë të grumbulluara pasi u zëvendësuan me ato prej betoni dhe hekuri.
Përveç banesave, në afërsi të vatrës së zjarrit ndodhen edhe magazina të ish-ndërmarrjeve të para viteve ’90, të cilat sot përdoren nga privatë. Ky fakt e shton rrezikun, pasi brenda tyre mund të ketë materiale të ndezshme që mund të përhapin zjarrin me shpejtësi.
Ndërkohë, reja e zezë e tymit ka mbuluar jo vetëm zonën përreth, por edhe pjesë të tjera të qytetit të Fierit dhe rrethinave, duke shkaktuar shqetësim për ndotjen e ajrit. Autoritetet i kanë bërë thirrje qytetarëve të shmangin lëvizjen pranë zonës së zjarrit dhe të mbyllin dritaret për të evituar thithjen e tymit toksik.
Zjarrfikësit vijojnë punën për neutralizimin e flakëve, ndërsa pritet që policia dhe shërbimet hetimore të përcaktojnë shkakun e vërtetë të këtij zjarri që po mbahet nën kontroll me vështirësi.
