Të dielën votojnë 334 mijë qytetarë për kryebashkiakët e rinj në pesë bashki, pas një fushate të pazakontë dhe pa praninë e liderëve politikë.
Sot mbyllet zyrtarisht fushata zgjedhore për zgjedhjet lokale të pjesshme në pesë bashki të vendit. Të dielën, 334,539 qytetarë me të drejtë vote do t’u drejtohen qendrave të votimit për të zgjedhur kryetarët e rinj të bashkive Vlorë, Berat, Cërrik, Mat dhe Tepelenë.
Dita e së shtunës do të shënojë heshtjen zgjedhore. Kjo fushatë është konsideruar si një nga më të qetat e viteve të fundit, pasi munguan tubimet masive, zhurma politike dhe sfidat publike mes kandidatëve apo liderëve.
Në asnjërin prej qyteteve nuk u panë mitingje të mëdha dhe as prezencë e kryetarëve të partive kryesore. As kryeministri Rama dhe as ish-kryeministri Berisha nuk morën pjesë në takime elektorale, duke e bërë këtë fushatë krejtësisht ndryshe nga të mëparshmet.
Në Vlorë, ku janë të regjistruar 171,895 votues, gara do të zhvillohet mes Brunilda Mersinit të PS-së dhe dy kandidatëve të mbështetur nga demokratët, Dionis Sota dhe Gjergj Nika. Mersini la mandatin e deputetes për të kandiduar për kreun e bashkisë.
Në Berat, me 82,161 votues, PS ka propozuar Ervin Cecën, i cili garon përballë Pavlo Shkarpës. Procesi pritet të jetë i qetë, por me konkurrencë të dukshme në terren.
Një garë treshe pritet në Mat, ku 29,092 votues do të zgjedhin mes Altin Bojnit të PS, Suzana Pashës si kandidate e pavarur me prejardhje socialiste dhe Eduart Brahilikës, të mbështetur nga opozita.
Në Cërrik, ku janë të regjistruar 38,724 votues, socialistët kanë propozuar Florenc Dokën. Përballë tij qëndron kandidati i pavarur Amarildo Hoxha, i mbështetur nga PD, si edhe kandidati Eligert Hima nga “Lëvizja Shqipëria Bëhet”.
Edhe në Tepelenë, me 12,667 votues, gara zhvillohet mes kandidatit të PS-së Gramoz Sako dhe të pavarurit Gabriel Guma, i mbështetur nga opozita.
Një element i rëndësishëm i këtyre zgjedhjeve është mandati i kufizuar i kryebashkiakëve të rinj. Ata do të qëndrojnë në detyrë vetëm për rreth një vit e gjysmë, deri në zgjedhjet vendore të pranverës 2027.
Pavarësisht fushatës së zbehtë, këto zgjedhje mbeten të rëndësishme për drejtimin lokal dhe balancën e forcave politike në terren. Fokus i vëzhguesve do të jetë pjesëmarrja e votuesve dhe ndikimi real i kandidatëve të pavarur.
Lista e votuesve të regjistruar sipas bashkive është si vijon: Vlorë 171,895; Berat 82,161; Cërrik 38,724; Mat 29,092; Tepelenë 12,667. Në total, 334,539 qytetarë do të vendosin drejtimin e pushtetit lokal në këto pesë bashki.
