Dosja e SPAK hedh dritë mbi komunikimet e përgjuara në aplikacionin Sky ECC, të cilat lidhen me hetimin e një grupi që dyshohet se ka trafikuar sasi të mëdha kokaine nga Amerika Latine dhe Shqipëria drejt Italisë, me total rreth 1.3 ton. Mes personave të arrestuar është edhe oficeri i Antiterrorit, Igli Haxhiaj, i cili është lënë në burg nga GJKKO, pasi dyshohet se ka dhënë informacione të klasifikuara në këmbim të parave për persona të përfshirë në hetim.
Komunikimet në Sky ECC tregojnë se Haxhiaj, përveç kërkesave për informacione të paguara, ka diskutuar edhe për blerjen, shitjen dhe transportimin e lëndëve narkotike. Në disa biseda të datave të ndryshme ai flet me përdorues të tjerë të aplikacionit për cilësinë e mallit, çmimet, mënyrat e transportit dhe vendet ku ndodhej sasia e drogës, duke përfshirë Hollandën, Spanjën, Roterdamin dhe Barcelonën.
Në një prej bisedave, më 10 shkurt 2021, Haxhiaj diskuton rreth rrezikut të grabitjeve dhe kërkon informacione për t ua përcjellë personave që do të shkonin për të marrë mallin. Më 8 mars 2021 ai komunikon për çmimet e kokainës, duke përmendur oferta prej 29 mijë euro dhe mall të përzier me çmime më të ulëta.
Në datën 1 mars 2021, një bashkëbisedues i ofron mall që gjendej në Athinë, ndërsa përmenden çmime prej 29 mijë euro për blerje dhe 2 mijë euro për transport. Në një bisedë tjetër, Haxhiaj kërkon kampion për testim, përpara blerjes së sasisë.
Komunikime të tjera flasin për mall në Roterdam dhe Barcelonë, me çmime që varionin nga 27 mijë deri në mbi 38 mijë euro për kilogram, ndërsa përmenden edhe dërgesa prej 500 kilogramësh dhe lloje të ndryshme stampash të kokainës.
Në disa raste Haxhiaj dërgon fotografi të mallit të dyshuar dhe kërkon detaje për cilësinë, origjinën dhe mundësinë e sjelljes në Shqipëri. Po ashtu ai shprehet se disponon transport dhe kërkon të dijë nëse pagesat duhen bërë në vend apo në Shqipëri.
Sipas SPAK, bisedat tregojnë pa asnjë dyshim se Igli Haxhiaj ka pasur dijeni për mbajtjen, shitjen dhe transportimin e lëndëve narkotike, duke pasur detyrimin ligjor si oficer i policisë gjyqësore të niste procedim penal. Hetimet deri tani nuk kanë sjellë gjetjen e ndonjë sasie të sekuestruar brenda këtyre episodeve, por përmbajtja e komunikimeve konsiderohet provë e qartë e lidhjes së tij me veprimtari të paligjshme.
