Një ngjarje e rëndë tronditi mbrëmë fshatin Kryekuq të Divjakës, ku 32-vjeçari Besmir Kumria u godit me thikë dhe ndërroi jetë nga plagët.
Ngjarja ndodhi në orët e vona të së martës, brenda një lokali ku ndodheshin disa persona. Sipas burimeve, konflikti mes autorit Xhesian Toromëni 25 vjeç dhe viktimës shpërtheu papritur, duke përfunduar tragjikisht.
Të pranishmit kanë deklaruar se nuk e njihnin autorin e sulmit, edhe pse ai është banor i fshatit Kryekuq. Ai u largua me shpejtësi nga vendngjarja, duke i shpëtuar arrestimit në momentin e krimit.
Policia nisi kërkimet intensive për kapjen e tij, ndërsa po merren në pyetje të gjithë personat që ndodheshin në lokal për të zbardhur rrethanat e ngjarjes. Autoritetet e policisë Fier kanë arritur të kapin autorin, me akuzën e vrasjes me paramendim dhe mbajtjes pa leje të armëve të ftohta.
Viktima, i identifikuar si Besmir Kumria, jetonte në Divjakë dhe punonte si punëtor sezonal në Himarë.
Grupi hetimor po mbledh prova dhe dëshmi, ndërsa nuk dihen ende shkaqet e konfliktit. Autoritetet pritet të publikojnë informacion më të detajuar në orët në vijim.
