Gjykata e Apelit me Juridiksion të Përgjithshëm ka vendosur të lërë në fuqi masën e sigurisë “arrest në burg” për 14-vjeçarin e dyshuar si autor të vrasjes së bashkëmoshatarit të tij, Martin Cani.
Vendimi i Apelit, i dhënë sot më 17 dhjetor 2024, mbështet atë të dhënë më parë nga Gjykata e Shkallës së Parë.
Ngjarja tragjike ndodhi më 18 nëntor 2024, pranë shkollës “Fan Noli” në Tiranë, ku studionte viktima. Gjatë një sherri mes të miturve, Cani humbi jetën, ndërsa një tjetër 14-vjeçar, shoku i tij L.M., mbeti i plagosur dhe u transportua në Itali për trajtim mjekësor të specializuar.
Prokuroria e Tiranës kërkoi që arrestimi në flagrancë i të dyshuarit të vlerësohej si i ligjshëm dhe që të caktohej masa e sigurisë “arrest në burg”. Kjo kërkesë u pranua nga Gjykata e Shkallës së Parë, e cila në vendimin e saj të datës 22 nëntor 2024, e argumentoi mbajtjen në paraburgim të të dyshuarit duke iu referuar nenit 238 të Kodit të Procedurës Penale.
Të miturit, identiteti i të cilit nuk është bërë publik për shkak të moshës, i është atribuar akuza për “vrasje të kryer në rrethana cilësuese”, sipas nenit 79, shkronja “a” të Kodit Penal.
Në vijim të vendimit të Gjykatës së Shkallës së Parë, të miturit i ishte lënë e drejta për apel. Gjatë shqyrtimit të sotëm, Apeli, i kryesuar nga gjyqtarja Elona Mihali, nuk gjeti shkaqe për të ndryshuar masën e sigurisë, duke e konsideruar vendimin e mëparshëm të drejtë dhe të mbështetur në prova ligjore.
Gjykata vendosi të konfirmojë vlerësimin e ligjshmërisë së arrestimit në flagrancë dhe masën e sigurimit të vendosur ndaj të miturit, duke ngarkuar Policinë Gjyqësore për zbatimin e këtij vendimi.
Ngjarja ka tronditur komunitetin lokal dhe ka ngritur pyetje të shumta mbi sigurinë e të miturve në zonat pranë shkollave. Gjithashtu, kjo çështje ka hapur diskutime mbi nevojën për politika më efektive për parandalimin e dhunës mes të rinjve.
Apeli i sotëm është konsideruar si një hap i rëndësishëm për t’i dhënë drejtim ligjor këtij rasti, ndërsa procesi hetimor për rrethanat e plota të ngjarjes vijon.
