Ndoc Maçaj u vetëdorëzua në polici pas vrasjes së kushëririt të tij Piro Prroni, duke dorëzuar edhe armën e krimit pas disa orësh negociata.
Mbrëmjen e së enjtes, fshati Abat i Shalës në Shkodër u trondit nga një ngjarje e rëndë. 58-vjeçari Ndoc Maçaj qëlloi për vdekje me armë zjarri kushëririn e tij, 61-vjeçarin Piro Prroni, pas një sherri që dyshohet se kishte lidhje me pronësinë e tokës. Pas disa orësh, rreth orës 02:30 të mëngjesit, ai u vetëdorëzua në polici bashkë me armën e përdorur, pas negociatave me drejtorin e policisë së Shkodrës, Gentian Berberi.
Sipas burimeve, të dy ishin ulur në të njëjtën tavolinë duke konsumuar pije kur ndodhi konflikti. Një plumb i vetëm goditi viktimën në shpatull, duke i shkaktuar vdekjen. Deri më tani nuk janë sqaruar plotësisht motivet, ndërsa hetuesit presin që autori të jetë në gjendje të japë deklaratë të qartë pasi t’i kalojë efekti i alkoolit.
Burime nga zona pohojnë se kushërinjtë kishin pasur prej kohësh përplasje për një sipërfaqe toke në Shalë. Ky konflikt lidhet me procesin e regjistrimit të pronave që ka nisur në zonë dhe që duket se ka nxitur tensione mes familjarëve.
Në vendngjarje, policia gjeti dy gëzhoja pistolete dhe dy mjete prerëse – një thikë dhe një kmesë – që u sekuestruan si prova materiale. Uniformat blu po hetojnë për të zbuluar të gjitha rrethanat që çuan në këtë ngjarje të rëndë.
Policia e Shkodrës konfirmoi se Maçaj akuzohet për “vrasje me dashje” dhe “mbajtje pa leje të armëve, armëve shpërthyese dhe municionit”. Materialet e çështjes janë referuar Prokurorisë për veprime të mëtejshme procedurale.
Ngjarja ka shkaktuar tronditje tek banorët e zonës, të cilët e përshkruajnë marrëdhënien mes dy kushërinjve si të tensionuar prej kohësh, por nuk e kishin imagjinuar që do të përfundonte me një tragjedi të tillë. Hetimet pritet të zbardhin nëse konflikti për tokën ishte motivi kryesor apo në lojë kanë qenë edhe arsye të tjera personale.
