Kompania franceze Voltalia do të fillojë këtë vit ndërtimin e parkut diellor në Spitallë, me operim të plotë tregtar të planifikuar për janar 2027.
Sipas dokumentacionit të dorëzuar në autoritetet shqiptare, projekti “Spitalla Solar” do të ndërtohet në territorin e Bashkisë Durrës, pranë fshatrave Adriatik, Vrinas (Shënavlash) dhe Spitallë, duke përfshirë një sipërfaqe prej rreth 123 hektarësh në zonën kadastrale nr. 8517. Kapaciteti i instaluar i impiantit do të jetë 100 MW, me një afat ndërtimi prej 15 muajsh.
Punimet pritet të nisin në nëntor 2024, ndërsa kantieri të jetë gati deri në qershor 2025. Faza e punimeve mekanike dhe elektrike do të zhvillohet nga nëntori 2025 deri në nëntor 2026, për t’i hapur rrugë testimeve në fund të atij viti. Operimi tregtar do të nisë në janar 2027, pas përfundimit të të gjitha procedurave të kontrollit dhe certifikimit.
Ky është projekti i dytë madhor i Voltalia në Shqipëri, pas parkut fotovoltaik të Karavastasë, i cili hyri në operim në dhjetor 2023. Karavastaja, me kapacitet 140 MW, prodhoi vitin e kaluar mbi 258 mijë MWh energji, duke mbuluar 3.2% të prodhimit neto vendas.
Në garën e mbajtur për Spitallën në vitin 2021, Voltalia siguroi kontratën me çmim 29.89 euro/MWh. Nga kapaciteti total, 70 MW do të shiten me çmim të rregulluar te Operatori i Shpërndarjes së Energjisë Elektrike përmes një kontrate afatgjatë, ndërsa 30 MW do të tregtohen në tregun e lirë.
Projekti pason suksesin e Voltalia-s në ankandin e parë të energjisë diellore në Shqipëri për Karavastanë, të fituar në vitin 2020 me çmim rekord prej 24.89 euro/MWh. Modeli i ndarjes së prodhimit mes tregut të lirë dhe çmimit të rregulluar pritet të ndiqet edhe në Spitallë, duke siguruar stabilitet për prodhuesin dhe furnizim të qëndrueshëm për sistemin energjetik.
Voltalia ka shprehur interes për zgjerim të mëtejshëm në Shqipëri, duke ftuar investitorë privatë dhe pronarë tokash të ofrojnë truall për projekte të reja fotovoltaike. Kjo tregon qartë strategjinë e kompanisë për të forcuar pozicionin e saj në tregun e energjisë së rinovueshme në vend.
