Vllaznia kurorëzohet kampione e Shqipërisë për edicionin 2024-2025 në futbollin e vajzave, pas një fitoreje 2-0 ndaj Partizanit në finalen vendimtare të Final Four, duke shkruar një tjetër faqe të artë në historinë e saj.
Në “Arenën e Demave” u zhvillua një përballje e fortë, ku Vllaznia tregoi edhe një herë supremacinë në futbollin e femrave. Skuadra kuqeblu dominoi finalen, duke shënuar dy gola të rëndësishëm me autorësi të Arbiona Bajraktarit dhe Megi Doçit, që i dhanë trofeun e 12-të radhazi në këtë kompeticion.
Pjesa e parë e finales përfundoi pa gola, ndërsa momenti vendimtar erdhi në minutën e 52-të kur Bajraktari zhbllokoi rezultatin dhe i dha siguri ekipit shkodran. Pak minuta më pas, në të 72-ën, Megi Doçi vulosi përfundimisht suksesin e Vllaznisë, duke i larguar shpresat Partizanit për të përmbysur rezultatin.
Pas mbylljes së ndeshjes, atmosfera ishte festive. U zhvillua ceremonia e dorëzimit të medaljeve dhe kupës, ku Anila Basha, anëtare e Komitetit Ekzekutiv të FSHF-së, i dorëzoi ekipit të Vllaznisë medaljet dhe trofeun, duke nderuar kështu performancën e jashtëzakonshme të vajzave.
Ky triumf i jep Vllaznisë të drejtën të përfaqësojë sërish Shqipërinë në raundin para-eliminator të UEFA Women’s Champions League për sezonin 2025-2026, duke mbajtur të hapur ëndrrën europiane të këtij ekipi të suksesshëm.
Ndërkohë, Partizani, me vendin e dytë të fituar këtë sezon, siguron për herë të parë pjesëmarrjen në raundin para-eliminator të kompeticionit të ri, UEFA Women’s Europa Cup, duke shënuar një tjetër arritje historike për klubin.
Në finalen për vendin e tretë, Gramshi arriti të mposhtë Apoloninë me rezultatin 2-1, duke siguruar kështu një pozicion të rëndësishëm në këtë edicion të kampionatit.
Ky edicion konfirmon rritjen e nivelit dhe rivalitetit në futbollin e vajzave në Shqipëri, duke sjellë emocione dhe shpresa të reja për të ardhmen europiane të skuadrave tona.
