Përfaqësuesja e Lartë e Bashkimit Evropian për Politikë të Jashtme, Kaja Kallas, nis turin në rajon, do të zhvillojë takime me liderë partish politike dhe organizata të shoqërisë civile në Prishtinë, pa përfshirë zyrtarë të institucioneve shtetërore, sipas agjendës së bërë publike nga BE
Kaja Kallas, Përfaqësuesja e Lartë e BE-së për Politikë të Jashtme dhe Siguri, ka nisur një vizitë zyrtare në Ballkan, duke filluar nga Beogradi, ndërsa të enjten pritet të mbërrijë në Prishtinë. Bashkimi Evropian ka publikuar agjendën e plotë të vizitës, ku theksohet se qëllimi kryesor është takimi me drejtues të partive politike dhe përfaqësues të shoqërisë civile në Kosovë.
Sipas njoftimit zyrtar të Brukselit, Kallas do të organizojë një konferencë për shtyp në Shtëpinë e Evropës në Prishtinë më 22 maj, duke filluar nga ora 15:45. Kjo konferencë do të transmetohet drejtpërdrejt në kanalin EBS, duke ofruar transparencë dhe informim për publikun.
Në axhendë parashikohet edhe një vizitë pranë Misionit të Bashkimit Evropian për Sundimin e Ligjit në Kosovë (EULEX), ku Kallas do të njihet nga afër me punën dhe sfidat që përballon ky mision ndërkombëtar. Gjatë qëndrimit të saj në Prishtinë, ajo do të takohet edhe me komandantin e KFOR-it, Enriko Barduani, duke theksuar rolin e sigurisë në stabilitetin rajonal.
Takimet me liderët e partive politike do të zhvillohen në zyrën e BE-së në Prishtinë dhe janë të fokusuara në dialogun politik dhe bashkëpunimin për çështje kyçe të agjendës evropiane për Kosovën. Ftesat janë bërë në nivel të kryetarëve të partive si dhe dy zyrtarëve të tjerë politikë.
Ndërkohë, është bërë e ditur se presidentja e Kosovës, Vjosa Osmani, nuk do të jetë e pranishme gjatë vizitës së Kallas, pasi ndodhet në një vizitë zyrtare në Zvicër. Javën e kaluar, Osmani pati një takim me Kallas në Tiranë, në kuadër të Samitit të Komunitetit Politik Evropian.
Në axhendë përfshihet edhe një takim me Albin Kurtin, si kryetar i Vetëvendosjes, duke sjellë automatikisht takimin edhe me kryeministrin aktual të Kosovës, pavarësisht deklaratave të BE-së se nuk do të ketë takim me zyrtarë shtetërorë.
Kjo vizitë e Kaja Kallas konsiderohet si një hap i rëndësishëm për thellimin e dialogut midis BE-së dhe Kosovës, me fokus në mbështetjen për sundimin e ligjit, dialogun politik dhe bashkëpunimin rajonal në rrugën drejt integrimit evropian.
