Kryeministri Edi Rama ishte i pranishëm në Madrid, ku njoftoi se Tirana do të jetë mikpritëse e Kongresit Botëror të Ligjeve në vitin 2027.
Gjatë fjalës së tij, ai theksoi transformimin e imazhit të Shqipërisë në arenën ndërkombëtare dhe rritjen e interesit për vendin.
Rama u shpreh se Shqipëria ka luftuar për vite me radhë kundër stigmatizimit dhe paragjykimeve, ndërsa sot është një destinacion i njohur turistik, duke tërhequr mbi 12 milionë vizitorë të huaj në vit. Ai theksoi se vendi synon të bëhet lider në mikpritje dhe të jetë një model i suksesit në rajon.
“Ne mund të jemi pas në shumë gjëra, por synojmë të marrim ‘Kupën e Botës’ në mikpritje. Të gjithë të pranishmit këtu kanë një ftesë të hapur për të vizituar Shqipërinë,” u shpreh Rama gjatë fjalës së tij.
Gjatë vizitës në Madrid, kryeministri shqiptar pati gjithashtu një takim me Mbretin e Spanjës, duke e cilësuar atë si një personalitet të veçantë dhe mikpritës.
Në vijim, ai kujtoi të kaluarën e errët të izolimit të Shqipërisë, duke e krahasuar atë me Korenë e Veriut të Europës, por theksoi se sot vendi ka fituar një reputacion të ri dhe është një histori suksesi.
“Ne kemi kaluar nga një e kaluar e izoluar në një vend të hapur ndaj botës, që tërheq miliona turistë dhe investitorë. Për më tepër, kemi një nga normat më të ulëta të vjedhjeve në Europë,” shtoi ai.
Kongresi Botëror i Ligjeve është një nga eventet më të rëndësishme në fushën juridike, duke mbledhur ekspertë, akademikë dhe liderë politikë nga e gjithë bota. Pritet që organizimi i tij në Tiranë të sjellë vëmendje të madhe ndërkombëtare për Shqipërinë.
