Policia Rrugore ka rritur masat për monitorimin dhe parandalimin e aksidenteve rrugore në gjithë territorin e Shqipërisë.
Aksionet e reja përfshijnë përdorimin e teknologjive të avancuara si dronë, radarë, kamera, makina inteligjente dhe patrulla me mjete të pauniformuara që operojnë 24 orë në 7 ditë të javës. Ky angazhim ka për qëllim garantimin e sigurisë në rrugë dhe uljen e numrit të aksidenteve.
Një bashkëpunim intensiv është vendosur me administratorët e mirëmbajtjes së tuneleve, të cilët monitorojnë gjithashtu lëvizjet në tunele dhe sigurojnë filmimet nga kamerat dhe radarët e instaluar, të cilat menaxhohen nga Policia Rrugore. Kjo është një masë që ka si synim të rrisë mbikëqyrjen dhe të mundësojë ndërhyrjen e shpejtë në raste të nevojshme.
Për çdo shkelje të konstatuar nga ky monitorim, Policia Rrugore vendos masa administrative që pasqyrohen menjëherë në portalin e-Albania, duke i njoftuar drejtuesit e automjeteve dhe personat përgjegjës. Pavarësisht shkeljeve, pas këtyre masave administrative, aplikohet edhe një sanksion plotësues. Ky sanksion përfshin zbritjen deri në 15 pikë nga leja e drejtimit, duke ulur kështu mundësinë e shkeljeve të tjera dhe duke forcuar disiplina në rrugë.
Në dy javët e fundit, Policia Rrugore ka dhënë masa administrative për 165 drejtues automjetesh që kanë shkelur rregullat e trafikut në Tunelin e Murrizit. Këta drejtues janë ndëshkuar me një gjobë prej 40,000 lekësh të rinj, dhe gjithashtu janë ndëshkuar me zbritje prej 15 pikësh nga leja e drejtimit.
Për më tepër, Policia Rrugore apelon për një angazhim të shtuar të të gjithë pjesëmarrësve në trafik. Drejtuesit e automjeteve, motomjeteve, këmbësorët, si dhe ata që lëvizin me biçikleta dhe monopatina, duhet të respektojnë me rigorozitet rregullat e qarkullimit rrugor. Angazhimi i të gjithëve është i nevojshëm për një mjedis më të sigurt dhe për parandalimin e aksidenteve fatale.
