Një aksident i rëndë rrugor në autostradën Fier–Lushnje përfshin një automjet tip Benz dhe një furgon udhëtarësh, me disa të plagosur dhe me mjettin Benz të djegur plotësisht në kanalin kullues.
Një ngjarje tronditëse ka ndodhur rreth orës 03:30 të mëngjesit në autostradën Fier–Lushnje, në afërsi të vendit të njohur si “pushimi i shoferit”. Një automjet tip Benz ka goditur me shpejtësi të lartë nga pas një furgon udhëtarësh që po udhëtonte drejt aeroportit të Rinasit.
Përplasja ka qenë aq e fortë sa benzi ka kaluar barrierat mbrojtëse metalike dhe ka përfunduar në kanalin kullues përgjatë autostradës, ku më pas është përfshirë nga flakët. Fatmirësisht, katër personat që ndodheshin në këtë makinë kanë arritur të dalin dhe t’i shpëtojnë flakëve.
Ndërkohë, furgoni me 7 pasagjerë dhe drejtuesin e mjetit është zhvendosur disa qindra metra më tej si pasojë e goditjes së rëndë. Pamjet e para nga vendngjarja tregojnë për një përplasje të dhunshme dhe pasoja të mëdha materiale.
Disa nga udhëtarët e furgonit janë dërguar me urgjencë në spitalin e Lushnjes. Dy prej tyre ndodhen në gjendje të rëndë shëndetësore, sipas burimeve spitalore, ndërsa të tjerët kanë marrë trajtim për dëmtime më të lehta.
Policia mbërriti menjëherë në vendngjarje, duke nisur hetimet për të zbardhur shkaqet e sakta të aksidentit. Paraprakisht, dyshohet se shpejtësia tej normave të lejuara ka qenë faktori kryesor i ngjarjes.
Trafiku në aksin Fier–Lushnje është rënduar për disa orë për shkak të aksidentit, ndërkohë që forcat zjarrfikëse u angazhuan për shuarjen e flakëve në automjetin e djegur. Autoritetet bëjnë thirrje për kujdes të shtuar në rrugë, veçanërisht gjatë orëve të natës.
