Kurban Bajrami, dita që forcon devotshmërinë, nxit dashurinë për Zotin dhe bashkon familjet e komunitetin në Fier dhe mbarë vendin
Kurban Bajrami konsiderohet si një nga festat më të mëdha dhe më të rëndësishme për besimtarët myslimanë. Në këtë ditë të veçantë, komuniteti mysliman ftohet të forcojë lidhjen me Zotin, të përqafojë devotshmërinë dhe të ndajë frymën e sakrificës me të afërmit e me gjithë shoqërinë përreth.
Atmosfera e festës u ndje herët në mëngjes në Fier, ku qindra besimtarë u mblodhën në sheshin qendror për të falur namazin e Kurban Bajramit. Falja nisi në orën 6:40, nën udhëheqjen e myftiut të Fierit, Mikel Hazizolli, i cili theksoi rëndësinë e paqes, harmonisë dhe respektit reciprok.
Gjatë ceremonisë, myftiu Hazizolli i kujtoi besimtarëve se Kurban Bajrami nuk është vetëm një ritual fetar, por mbart një mesazh të thellë devotshmërie dhe falënderimi ndaj Allahut, siç thuhet edhe në Kuran: “Tek Zoti nuk shkon as mishi, as gjaku i kurbanit, por devotshmëria juaj”.
Në këtë ngjarje mori pjesë edhe imami i Rreth Libofshës, Albert Kanani, i cili përcolli urimet më të përzemërta për të gjithë besimtarët dhe theksoi rëndësinë e dashurisë dhe solidaritetit në këtë ditë të madhe.
Pas përfundimit të faljes, besimtarët ndanë përqafime dhe urime të sinqerta për njëri-tjetrin, duke u lutur për gëzim, shëndet dhe begati në familjet e tyre. Sheshi i Fierit u mbush me harmoni dhe gëzim, duke e kthyer këtë moment në një simbol të bashkimit shpirtëror dhe social.
Kurban Bajrami në Fier është dëshmi e një komuniteti të bashkuar, që ruan vlerat e traditës dhe kultivon frymën e mirëkuptimit. Festa mbetet një ngjarje që afron njerëzit dhe forcon lidhjet e tyre shoqërore.
Nga zemra e Fierit, përshëndetjet më të ngrohta për Kurban Bajramin! Gëzuar këtë festë të shenjtë për të gjithë!
