Parashqevi Simaku, këngëtarja e njohur shqiptare, e cila prej më shumë se dy dekadash kishte humbur kontaktet me familjen dhe Shqipërinë, ka gjetur mbështetje nga biznesmeni dhe modeli shqiptar në SHBA, Elton Ilirjani.
Ai ka deklaruar publikisht se ka siguruar një strehim të përkohshëm për artisten e njohur, e cila jetonte si e pastrehë në rrugët e New York-ut.
Përmes një postimi në Instagram, Ilirjani ndau detaje nga takimi i tij i parë me Simakun, duke treguar se fillimisht kanë konsumuar një kafe së bashku. Ai gjithashtu publikoi pamje nga një dhomë hoteli në Manhattan, ku këngëtarja do të qëndrojë për tre javët e ardhshme. Sipas tij, gjatë kësaj kohe do të merret një vendim i përbashkët mes saj dhe familjarëve për të ardhmen e saj.
“Dje, ajo fjeti jashtë, dhe kjo më ka prekur shumë. Nuk e dija që rrinte në një stacion treni. Tani, me ndihmën e zonjës Elvira, e cila e gjeti, kemi arritur ta strehojmë përkohësisht,” tha Ilirjani. Ai theksoi emocionet e tij për këtë gjest human dhe shpresën se kjo është një hap drejt një zgjidhjeje afatgjatë për Simakun.
Në një tjetër video të publikuar në rrjetet sociale, Ilirjani shihet duke darkuar me Simakun dhe zonjën Elvira. Në një moment emocionues, ata këndojnë këngën “Dhuratë për Ditëlindje”, duke shprehur solidaritetin e tyre për artisten që dikur ishte një figurë e dashur për publikun shqiptar.
@thuaje__shqip Elton Ilirjani i dhuron sende me vlerë ikonës shqiptare,Parashqevi Simakut😍 #fyp #viral #albania #viralvideos ♬ original sound – Oficiial Account
Simaku, e cila u bë e njohur për interpretimet e saj në skenat shqiptare, emigroi në SHBA në vitin 1992. Jeta e saj në emigracion u shoqërua me sfida të shumta, përfshirë divorcin me bashkëshortin amerikan dhe shkëputjen nga i biri. Këto rrethana e çuan atë në izolim, duke humbur çdo lidhje me familjen dhe vendlindjen.
Kohët e fundit, Simaku u bë sërish pjesë e vëmendjes publike pas një videoje të transmetuar në një kanal amerikan, ku ajo shihej duke marrë ndihma si person i pastrehë. Kjo video u konfirmua nga familjarët e saj përmes një deklarate për Report TV, duke thënë se Simaku kishte humbur kontaktet me ta prej vitesh.
Historia e saj
Historia e saj ka prekur zemrat e shumë shqiptarëve, të cilët kanë ofruar ndihmë për ta ndihmuar këngëtaren të rikthehet në jetë normale. Ndërsa disa kanë treguar gatishmëri të sinqertë për ta mbështetur, ka edhe nga ata që sipas Ilirjanit “kërkojnë të bëjnë protagonistin” me këtë situatë.
Elton Ilirjani, i cili shpesh shfaqet aktiv në kauza sociale, theksoi se ndihma për Simakun nuk duhet parë si një veprim për të marrë vëmendje, por si një detyrë njerëzore. “Parashqevi ka nevojë për mbështetje të sinqertë, jo për aludime. Nuk është e vërtetë që ajo nuk dëshiron të ndihmohet nga shqiptarët, ndoshta thjesht nuk ka pasur mbështetjen që i është premtuar,” tha ai.
Shumë shpresojnë që ky veprim do të jetë një hap i parë drejt rikthimit të Simakut në një jetë më të qëndrueshme. Solidariteti i shfaqur nga shqiptarët në diasporë dhe në vendlindje është një dëshmi e lidhjeve të forta mes tyre, pavarësisht viteve të largësisë.
Ndërkohë, pyetja se çfarë do të ndodhë me të ardhmen e Parashqevi Simakut mbetet e hapur. Familjarët e saj dhe Ilirjani pritet të diskutojnë së bashku për hapat e mëtejshëm. Për shumëkënd, ky është një rast i prekshëm që flet për sfidat e emigracionit dhe rëndësinë e mbështetjes komunitare.
