Shqipëria pozicionohet ndër vendet me përdorimin më të ulët të inteligjencës artificiale. Vetëm 15.8% e shqiptarëve deklarojnë se përdorin rregullisht mjete të AI në jetën e përditshme ose në punë, një nivel dukshëm më i ulët se mesatarja europiane, ku shumë shtete të BE-së e kalojnë pragun e 30–40%.
Vendet si Irlanda, Franca dhe Spanja arrijnë nivele përhapjeje mbi 39–41%, duke treguar një adoptim shumë më të shpejtë dhe më të gjerë të teknologjive të reja.
Europianët po përqafojnë inteligjencën artificiale, por disa vende tregojnë entuziazëm më të madh se të tjerat. Që prej lançimit të ChatGPT në vitin 2022, mbi 1.2 miliardë njerëz në mbarë botën kanë përdorur mjete të AI, sipas raportimeve të fundit. Ritmi i adoptimit është më i shpejtë se ai i teknologjive të mëdha të së kaluarës, përfshirë internetin, kompjuterin personal dhe smartfonin.
Sot, Bashkimi Europian është në pararojë të përdorimit të AI, veçanërisht vendet më të zhvilluara ekonomikisht. Irlanda kryeson me 41.7% përdorim të rregullt të AI, pasuar nga Franca (40.9%) dhe Spanja (39.7%).
Në anën tjetër të spektrit qëndrojnë Rumania (15.3%) dhe Greqia (17.7%), vendet me përdorim më të ulët të AI në BE.
Përtej BE-së, Norvegjia dhe Mbretëria e Bashkuar renditen gjithashtu ndër më entuziastet: 45.3% e norvegjezëve dhe 36.4% e britanikëve përdorin rregullisht inteligjencën artificiale.
Sipas analizave ndërkombëtare, adoptimi i AI lidhet ngushtë me nivelin e zhvillimit ekonomik të një vendi. Në Global North, përdorimi arrin rreth 23%, krahasuar me vetëm 13% në Global South. Vendet me furnizim të qëndrueshëm energjie, internet të besueshëm dhe infrastrukturë kompjuterike më të zhvilluar kanë ritme shumë më të larta përdorimi.
Megjithatë, pothuajse katër miliardë njerëz në botë jetojnë në rajone ku këta faktorë mbeten sfida serioze.
“Hendeku nuk lidhet vetëm me aksesin në mjetet e AI; ai pasqyron gjithashtu pabarazi më të gjera në infrastrukturë, arsim dhe gjuhë,” theksohet në analizë.
