Një auditim i Kontrollit të Lartë të Shtetit mbi mënyrën e zbatimit të vendimeve të Gjykatës Evropiane për të Drejtat e Njeriut ka evidentuar probleme serioze në respektimin e afateve ligjore dhe përmbushjen e detyrimeve ndërkombëtare të Shqipërisë për periudhën 2023–2024.

Sipas raportit, një numër i konsiderueshëm vendimesh të GJEDNJ-së janë ekzekutuar me vonesë, ndërsa disa vendime të dhëna në vitet 2015–2018 vijojnë të mbeten ende të pazbatuara. Vlera totale e këtyre vendimeve të papërmbushura kap shifrën rreth 17 milionë euro, duke krijuar një barrë të drejtpërdrejtë financiare për buxhetin e shtetit.

Auditimi thekson se zvarritja e ekzekutimit të vendimeve rrit ndjeshëm riskun e pagesës së interesave për vonesë, duke shtuar kostot për financat publike dhe duke cenuar besueshmërinë e shtetit në raport me detyrimet që rrjedhin nga Konventa Evropiane për të Drejtat e Njeriut.

Një tjetër problematikë e evidentuar është mungesa e llogaritjes së interesave nga Ministria e Financave, çka pengon Avokaturën e Shtetit të ketë një pasqyrë të plotë dhe të saktë mbi detyrimet reale financiare që burojnë nga vendimet e Strasburgut. Kjo situatë, sipas KLSH-së, krijon paqartësi institucionale dhe rrezik për menaxhimin korrekt të fondeve publike.

Raporti nënvizon se vonesat dhe mosveprimet e institucioneve përgjegjëse jo vetëm që dëmtojnë interesat financiare të shtetit, por rrezikojnë edhe respektimin e standardeve ndërkombëtare për mbrojtjen e të drejtave të njeriut, duke ekspozuar Shqipërinë ndaj pasojave të mëtejshme ligjore dhe reputacionale.

Në përfundim, Kontrolli i Lartë i Shtetit rekomandon ndërhyrje të menjëhershme institucionale për të garantuar zbatimin brenda afateve të vendimeve të Gjykatës Evropiane për të Drejtat e Njeriut, përmirësimin e koordinimit mes institucioneve dhe respektimin e plotë të ligjit dhe detyrimeve ndërkombëtare të vendit.