Propozimi i Presidentit të SHBA-së, Donald Trump, për të “marrë nën kontroll” Gazën dhe për të zhvendosur 1.8 milionë palestinezë, ka shkaktuar reagime të forta nga vendet e Bashkimit Evropian, të cilat e kanë kundërshtuar këtë plan dhe kanë shprehur mbështetje për zgjidhjen me dy shtete në rajon.
Sipas kësaj ideje, Gaza do të shndërrohej në një “Rivierë të Lindjes së Mesme”, por plani është parë si i papranueshëm dhe i dëmshëm për paqen në rajon.
Ministrja e Punëve të Jashtme të Gjermanisë, Annalena Baerbock, theksoi se një dëbim i palestinezëve nga Gaza do të ishte jo vetëm në kundërshtim me ligjin ndërkombëtar, por gjithashtu do të shkaktonte vuajtje dhe urrejtje të re. Ajo shtoi se zgjidhja nuk duhet të vijë mbi kokat e palestinezëve, duke i referuar kështu çdo lloj force që imponon zhvendosjen e popullsisë.
Franca gjithashtu ka shprehur një kundërshtim të qartë ndaj këtij plani, duke e quajtur transferimin e detyruar të palestinezëve një shkelje të rëndë të ligjit ndërkombëtar dhe një pengesë për zgjidhjen me dy shtete. Sipas ministrisë së Jashtme franceze, të ardhmen e Gazës nuk duhet ta diktojë një shtet i tretë, por një shtet palestinez të ardhshëm, nën administratën e Autoritetit Palestinez.
Edhe Spanja dhe Irlanda, dy shtete që vitin e kaluar e njohën shtetin palestinez, kanë kundërshtuar planin e Trump. Ministri i Jashtëm i Spanjës, José Manuel Albares, theksoi se Gaza është toka e palestinezëve dhe ata duhet të qëndrojnë aty, ndërsa ministri irlandez Simon Harris kërkoi që Shtëpia e Bardhë të shpjegojë më tepër qëndrimin e saj.
Në Britaninë e Madhe, kryeministri Keir Starmer gjithashtu shprehu dyshime mbi planin e Trump, duke theksuar se palestinezët duhet të kenë mundësinë të kthehen në shtëpitë e tyre dhe të rindërtojnë Gazën, me një fokus të qartë në arritjen e një zgjidhjeje me dy shtete. Ai e vuri theksin në ruajtjen e armëpushimit dhe ndihmën humanitare për Gazën, e cila po përjeton një katastrofë të rëndë humanitare.
Italia, përmes ministrit të Jashtëm Antonio Tajani, pranoi se do ta shqyrtonte planin e Trump, por mbetet në favor të një zgjidhjeje me dy shtete, duke theksuar se ndihma për palestinezët duhet të përfshijë rindërtimin e Gazës, pa pasur nevojë për zhvendosjen e banorëve.
Në kontrast me këto qëndrime, lideri i Partisë së Lirisë në Holandë, Geert Wilders, mbështeti idenë e Trump për të zhvendosur palestinezët në Jordani, një propozim që u kritikua nga Jordania dhe Egjipti, të cilët refuzuan të pranojnë një masë të tillë. Ministri i Jashtëm holandez, Caspar Veldkamp, theksoi se pozicioni i Holandës mbetet i pandryshuar: mbështetje për një zgjidhje me dy shtete, duke njohur një shtet palestinez të pavarur dhe të qëndrueshëm përkrah një Izraeli të sigurt.
