Një vajzë 4-vjeçare shqiptare humbi jetën në pishinën e një vile turistike, ndërsa nëna e saj përballet me akuza dhe pritet të dalë para prokurorit.
Një ngjarje e rëndë ka tronditur këtë pasdite ishullin grek të Paxosit, ku një fëmijë 4-vjeçar me origjinë shqiptare u gjet pa jetë në pishinën e një vile turistike. Familja e saj jetonte dhe punonte prej vitesh në këtë zonë, duke qenë e njohur nga komuniteti lokal.
Sipas dëshmive paraprake, vogëlushja po luante në kopshtin e shtëpisë rreth orës 15:00, kur i shpëtoi vëmendjes së nënës dhe u zhduk pa gjurmë. Pavarësisht kërkimeve të menjëhershme nga nëna dhe fqinjët, nuk u gjet asnjë shenjë e saj në fillim.
Pak minuta më vonë, kuzhinieri i një vile turistike, rreth 150 metra larg banesës, e gjeti trupin e pajetë në pishinë. Turistët që qëndronin në atë vilë nuk ndodheshin aty në atë moment, ndërsa punonjësi kishte mbërritur për të nisur shërbimin.
Vajza u transportua menjëherë në Qendrën Shëndetësore të ishullit, ku mjekët u përpoqën ta shpëtonin, por përpjekjet rezultuan të kota. Lajmi u përhap me shpejtësi në komunitet, duke shkaktuar tronditje dhe dhimbje.
Policia ndërhyri menjëherë në vendngjarje dhe shoqëroi nënën e fëmijës në Stacionin e Policisë së Paxosit. Autoritetet kanë konfirmuar se ajo do të dalë para prokurorit ditën e nesërme për t’u përballur me akuzat.
Hetimet vijojnë për të sqaruar çdo rrethanë të kësaj tragjedie, ndërsa banorët e ishullit shprehin indinjatën dhe dhimbjen për humbjen e një jete kaq të re.
