Në hyrje të qytetit të Milot, mbi lumin Mat, qëndron prej gati një shekulli një nga veprat më të rëndësishme të infrastrukturës shqiptare – Ura e Zogut.

E ndërtuar në vitin 1927, gjatë periudhës së drejtimit të Ahmet Zogu, kjo urë përfaqëson një nga investimet më të mëdha infrastrukturore të kohës. Me arkitekturë të veçantë dhe e realizuar nga inxhinierë italianë, ajo shërbeu për dekada si nyje kryesore lidhëse mes veriut dhe pjesës tjetër të vendit.

Por sot, pas afro 100 vitesh, Ura e Zogut ndodhet në një gjendje të rënduar. Amortizimi i strukturës, mungesa e mirëmbajtjes ndër vite, si dhe dëmtimet nga faktorët natyrorë kanë lënë gjurmë të dukshme në konstruksionin e saj. Çarje në beton, hekur i ekspozuar dhe degradim i bazamenteve janë disa nga problemet që evidentohen.

Edhe pse është shpallur monument kulture, ndërhyrjet për restaurimin e plotë të saj kanë munguar ose kanë qenë të pjesshme. Banorët e zonës dhe specialistët e trashëgimisë kulturore kanë ngritur vazhdimisht shqetësimin për rrezikun e degradimit të mëtejshëm.

Ura e Zogut nuk është thjesht një objekt betoni mbi lumin Mat. Ajo është pjesë e historisë së zhvillimit të shtetit shqiptar dhe një simbol i një epoke të rëndësishme.

Pyetja që mbetet është: a do të mund të shpëtohet kjo vepër historike nga shkatërrimi, apo do të lihet në harresë?

N&Gj