Partizani i Beogradit dhe Lech Poznani ndëshkohen financiarisht për banera me mesazhe politike gjatë ndeshjeve në garat evropiane
UEFA ka marrë masa të rrepta disiplinore ndaj dy klubeve, Partizanit të Beogradit dhe Lech Poznanit, për shkak të shfaqjes së banerave me përmbajtje politike në ndeshje të Conference League. Vendimi u publikua nga Komisioni Disiplinor, duke përcaktuar gjoba të majme dhe kufizime për tifozët.
Klubi polak Lech Poznan u gjobit me 10 mijë euro për një baner gjigant me mbishkrimin “Kosova është Serbi”, i ekspozuar gjatë ndeshjes së raundit të tretë kualifikues kundër Crvena Zvezdës. Ky veprim u cilësua shkelje e rregullave të UEFA-s që ndalon mesazhet politike në stadiume.
Ndërkohë, Partizani i Beogradit u godit me një dënim total prej 90 mijë e 250 eurosh. Nga kjo shumë, 17 mijë e 500 euro lidhen me incidentin e 31 korrikut kundër Oleksandriyës, ku tifozët shpalosën banera të papërshtatshme, përfshirë edhe të njëjtin mesazh politik për Kosovën.
Pjesa tjetër e gjobës, plot 72 mijë e 750 euro, iu vendos për shkelje të tjera gjatë dy ndeshjeve në Beograd, si bllokimi i rrugëve, përdorimi i lazerëve dhe ndezja e fishekzjarrëve.
Si masë shtesë, UEFA ka vendosur që në ndeshjen e ardhshme në shtëpi në kuadër të garave evropiane, Partizani i Beogradit të ketë të mbyllur një pjesë të tribunave, duke ulur me 10 mijë numrin e tifozëve të lejuar.
Këto vendime synojnë të japin një mesazh të qartë për ndalimin e përdorimit të stadiumeve si hapësira për mesazhe politike dhe veprime të dhunshme. UEFA ka paralajmëruar se dënime edhe më të ashpra mund të vendosen në rast përsëritjeje.
