Luftimet intensive në Ukrainë po shkaktojnë humbje të mëdha për trupat koreano-veriore që luftojnë në krah të Rusisë.
Zyrtarë perëndimorë raportojnë se rreth 40% e trupave të dërguara nga Koreja e Veriut, në vetëm tre muaj në rajonin e Kurskut në Rusi, janë vrarë ose plagosur.
Nga 11,000 trupa të njohura si pjesë e DPRK-së, rreth 4,000 janë raportuar si të vrarë, të plagosur, të zhdukur ose të kapur, ndërsa vetëm në muajt e fundit, rreth 1,000 ushtarë besohet se kanë humbur jetën. Përmasat e këtyre humbjeve ngrejnë pikëpyetje të mëdha mbi aftësitë dhe përgatitjen e trupave koreano-veriore për të përballuar realitetet e një lufte moderne.
Ndërkohë, nuk ka informacione të sakta për mënyrën e trajtimit të të plagosurve ose për planin e zëvendësimit të forcave të dëmtuara. Sipas burimeve, këto humbje dëshmojnë për një kosto të rëndë që po paguan Koreja e Veriut për të mbështetur Rusinë në përpjekjet e saj për të dëbuar forcat ukrainase nga territoret e pushtuara.
Raportimet tregojnë se trupat koreano-veriore, të njohura si njësi “elitare” me emrin Storm Corps, po hidhen në luftë me pak trajnim dhe mbështetje të kufizuar. Ish-komandanti britanik Hamish de Bretton-Gordon i përshkruan këto forca si “mish për top” dhe thekson se ato po drejtohen nga oficerë rusë që tregojnë pak kujdes për mirëqenien e tyre.
Burime të inteligjencës koreano-jugore shtojnë se trupat koreano-veriore janë të papërgatitura për luftën moderne dhe janë veçanërisht të prekshme ndaj teknologjisë së avancuar, si dronët FPV të Ukrainës, që kanë luajtur një rol kyç në betejat e fundit.
Megjithatë, komandanti i lartë ushtarak i Ukrainës, gjenerali Oleksandr Syrskyi, ka theksuar se këto trupa paraqesin një sfidë të konsiderueshme për forcat ukrainase. Sipas tij, ushtarët koreano-veriorë veprojnë në grupe të mëdha dhe ndjekin taktika të stilit sovjetik, duke mbështetur strategjitë e tyre kryesisht në numrin e lartë të trupave.
Për momentin, Ukraina vazhdon të ruajë territorin e fituar në rajonin e Kurskut, duke iu shkaktuar humbje të ndjeshme armikut dhe duke thelluar presionin ndaj forcave aleate ruse dhe koreano-veriore. Luftimet mbeten të ashpra, me të dyja palët që përballen me sfida të mëdha në terrenin e betejës.
