Donald Trump reagoi ndaj spekulimeve në rrjetet sociale se kishte ndërruar jetë, duke thënë se fundjavën e kaloi në golf dhe jo në morg.
Presidenti amerikan doli publikisht të martën për të hedhur poshtë zërat e pazakontë që qarkulluan në internet gjatë fundjavës. Me një ton ironik, ai i cilësoi këto pretendime si “thashetheme të çmendura” dhe “konspiracione qesharake”.
Trump tha se gjatë fundjavës së Ditës së Punës kishte qenë “shumë aktiv” dhe nuk kishte dëgjuar asgjë për këto lajme derisa ato nisën të shpërndaheshin masivisht. Ai u shpreh se nuk e kishte menduar kurrë se dy ditë mungesë nga skena publike do të shkaktonin një stuhi të tillë spekulimesh.
Sipas tij, disa njerëz mund të kenë shprehur shqetësime për shëndetin e tij, por ideja se kishte vdekur ishte “krejtësisht absurde”. Ai kujtoi se fundjavën e kaloi në klubin e tij të golfit në Virxhinia dhe dha një intervistë për “Daily Caller”, gjë që, sipas tij, dëshmon energjinë e tij të plotë.
Për të treguar aktivitetin e tij politik, Trump përmendi se javën e kaluar kishte zhvilluar një mbledhje kabineti që zgjati mbi tre orë, duke nënvizuar se angazhimi i tij mbetet i pandërprerë.
Në fund, ai e shfrytëzoi rastin për të thumbuar presidentin Joe Biden, duke thënë se ky i fundit mund të mungojë nga publiku për muaj të tërë pa shkaktuar reagime, ndërsa për të mjaftuan vetëm dy ditë për të nxitur teori të tilla.
Trump e mbylli deklaratën me një buzëqeshje ironike, duke lënë të kuptohet se këto lajme nuk e shqetësojnë, por i sheh si një shenjë e vëmendjes që publiku vazhdon t’i kushtojë figurës së tij.
