Presidenti amerikan Donald Trump ka pritur në Uashington liderët e Republikës Demokratike të Kongos dhe të Ruandës, të cilët nënshkruan një marrëveshje paqeje që synon t i japë fund konfliktit të gjatë në rajon. Samiti u mbajt në Institutin e Paqes Donald J Trump, ndërsa ceremonia u cilësua nga presidenti amerikan si një ditë e rëndësishme për Afrikën dhe për botën.
Nënshkrimi vjen pasi javët e fundit janë shënuar përshkallëzime të reja të luftimeve në lindjen e pasur me burime të DR Kongos, ku forcat qeveritare janë përballur me rebelët e M23 që besohet se mbështeten nga Ruanda. Ushtria e DR Kongos e akuzoi grupin për përpjekje për të sabotuar procesin e paqes, ndërsa M23 deklaroi se ishte ushtria që kishte shkelur armëpushimin.
M23 ka marrë nën kontroll zona të gjera në lindje të DR Kongos që në fillim të vitit, çka ka shkaktuar mijëra viktima dhe zhvendosjen e popullsisë.
Në fillim të samitit, Trump shprehu besim tek presidenti i DR Kongos Felix Tshisekedi dhe homologu i tij ruandez Paul Kagame, duke theksuar se të dy vendet do të zbatojnë marrëveshjen dhe do të krijojnë një të ardhme më të mirë për popujt e tyre.
Dy liderët, të cilët prej vitesh kanë shkëmbyer akuza të ndërsjella për nisjen e konfliktit, e kanë mbështetur zyrtarisht marrëveshjen e sigluar fillimisht në qershor nga ministrat e tyre të jashtëm. Ajo është miratuar gjithashtu nga disa liderë afrikanë të pranishëm në ceremoni, përfshirë përfaqësues nga Kenia, Angola, Burundi dhe Togo, si dhe nënkryetarin e Ugandës.
Në event, Kagame e vlerësoi Trumpin si një lider të paanshëm që nuk merr anë, duke e përshkruar qasjen e tij si pragmatike dhe efektive. Tshisekedi shprehu mirënjohje dhe shpresë të qartë, ndërsa kërkoi që Ruanda të respektojë plotësisht marrëveshjen.
Ceremonia u ndoq gjithashtu nga ministrat e jashtëm të Katarit dhe Emirateve të Bashkuara Arabe, si dhe nga Sekretari amerikan i Shtetit, Marco Rubio.
