Presidenti Donald Trump ka nënshkruar një urdhër ekzekutiv që ka si qëllim shpërbërjen e Departamentit të Arsimit të SHBA, duke e akuzuar këtë agjenci për shpërdorim të fondeve të taksapaguesve dhe për promovimin e “eksperimenteve progresive sociale”. Ky hap vjen pas një periudhe të gjatë kritike të Trump ndaj politikave arsimore federale dhe ka shkaktuar një reagim të menjëhershëm nga disa grupe arsimore dhe politikëbërës.
Departamenti i Arsimit, i krijuar në vitin 1979, ka pasur përgjegjësi të gjerë, përfshirë mbikëqyrjen e arsimit, dhënien e granteve dhe ndihmës studentore, si dhe zbatuar politikat kundër diskriminimit në shkollat e financuara nga qeveria federale. Megjithatë, Trump ka argumentuar se ky departament ka humbur misionin e tij fillestar dhe është bërë një aparat burokratik i politizuar që nuk ka ofruar rezultate pozitive.
Në një deklaratë të lëshuar të enjten, Presidenti Trump udhëzoi Sekretaren e Arsimit, Linda McMahon, të “marrë të gjitha hapat e nevojshëm për të lehtësuar mbylljen e Departamentit të Arsimit dhe për të kthyer autoritetin arsimor tek shtetet dhe komunitetet lokale”. Ky hap synon decentralizimin e arsimimit dhe rikthimin e përgjegjësisë në duar të autoriteteve shtetërore.
Shtëpia e Bardhë e mbështeti këtë vendim me argumentin se shpenzimet për arsim në shkollat publike janë rritur me më shumë se 245% që nga vitet 1970, por rezultatet e nxënësve në matematikë dhe lexim kanë rënë, duke vënë në dyshim efektivitetin e shpenzimeve të shtuar. Trump ka sugjeruar se heqja e departamentit do të mundësojë një sistem më të përshtatshëm dhe më efikas për nxënësit dhe do të ndihmojë për t’u shpëtuar programeve arsimore që ai i konsideron të vjetruara dhe të paefektshme.
Megjithatë, urdhri ekzekutiv nuk do të çojë në një mbyllje të plotë të të gjithë strukturave që menaxhojnë arsimin. Zëdhënësja e Shtëpisë së Bardhë, Karoline Leavitt, tha se departamenti do të vazhdojë të ekzistojë, por do të jetë shumë më i vogël dhe do të fokusohet kryesisht në administrimin e kredive studentore dhe granteve federale. Ky vendim është pjesë e një fushate më të gjerë për të shkurtime shpenzimet e qeverisë dhe për të reduktuar burokracinë, një iniciativë që është drejtuar nga ‘Departamenti i Efiçencës së Qeverisë’ (DOGE), një agjenci e krijuar nën udhëheqjen e Elon Musk.
Ky ndryshim ka ngjallur reagime të ndryshme. Disa mbështetës të Trump besojnë se ky është një hap i nevojshëm për të rritur efikasitetin dhe për të rikthyer autonominë tek shtetet. Nga ana tjetër, kritikët argumentojnë se ky veprim mund të dëmtojë arsimimin në nivel kombëtar dhe të thellojë pabarazitë arsimore ndërmjet shteteve.
