Donald Trump i ka kërkuar udhëheqësit të Koresë së Jugut t’i kalojë SHBA-së pronësinë e tokës ku ndodhen bazat ushtarake amerikane.
Gjatë një takimi me presidentin e Koresë së Jugut, Lee Jae-myung, Donald Trump ka ngritur çështjen e pronësisë së tokës që strehojnë bazat amerikane në territorin korean. Ai ka kërkuar gjithashtu që Seuli të paguajë më shumë për praninë e mbi 28 mijë ushtarëve amerikanë të stacionuar në vend.
Trump tha se Shtetet e Bashkuara kanë shpenzuar shuma të mëdha për ndërtimin e këtyre bazave, duke përmendur kontributin e Koresë së Jugut, por shprehu dëshirën të hiqej dorë nga marrëveshja e qirasë për të marrë pronësinë e tokës. Deklarata u bë brenda Zyrës Ovale, me homologun korean të ulur pranë tij.
Edhe pse Trump nuk përmendi një bazë specifike, dyshohet se bëhet fjalë për Kampin Humphreys, baza më e madhe ushtarake amerikane jashtë SHBA-së. Ajo ka një popullsi më të madhe se disa qytete amerikane dhe zgjerimi i saj i fundit ka kushtuar 10.8 miliardë dollarë, ku 90% e shumës u financua nga qeveria e Koresë së Jugut, sipas ish-komandantit të Forcave Amerikane në Kore, gjeneralit Vincent Brooks.
Sipas raporteve, tokat ku ndodhen bazat ushtarake amerikane në Korenë e Jugut janë në pronësi të qeverisë koreane dhe i jepen Forcave të Armatosura të SHBA-së “falas” për përdorim. Ky status ligjor ka qenë në fuqi për dekada dhe është pjesë e marrëveshjeve të sigurisë mes dy vendeve.
Kërkesa e Trump është interpretuar si një lëvizje që shkon përtej çështjeve të sigurisë, duke prekur drejtpërdrejt marrëdhëniet strategjike dhe ekonomike mes Uashingtonit dhe Seulit. Një ndryshim i tillë do të kishte pasoja të rëndësishme diplomatike dhe ligjore.
Çështja pritet të shkaktojë debat në të dy vendet, pasi çdo rishikim i marrëveshjeve të mbrojtjes do të ndikonte jo vetëm në balancën e sigurisë në Gadishullin Korean, por edhe në pozicionin e SHBA-së në rajonin e Azi-Paqësorit.
