Presidenti amerikan Donald Trump paralajmëroi Iranin me pasoja të rënda nëse ndërpret transportin detar të naftës në Ngushticën e Hormuzit, një nga arteriet kryesore të tregtisë globale të energjisë.

Në një reagim të publikuar në platformën Truth Social, Trump deklaroi se çdo përpjekje për të bllokuar kalimin e naftës përmes kësaj rruge strategjike do të përballet me një përgjigje shumë më të ashpër nga Shtetet e Bashkuara.

“Nëse Irani bën diçka që ndalon rrjedhën e naftës brenda Ngushticës së Hormuzit, ai do të goditet nga Shtetet e Bashkuara të Amerikës NJËZET HERË MË FORT sesa është goditur deri më tani”, shkroi ai.

Ngushtica e Hormuzit është një pikë kyçe për tregtinë globale, pasi rreth 20% e naftës botërore kalon përmes saj. Përshkallëzimi i tensioneve në rajon ka ulur trafikun detar dhe ka ndikuar në rritjen e çmimeve të naftës në tregjet ndërkombëtare.

Në deklaratën e tij, Trump paralajmëroi gjithashtu për pasoja shkatërruese në rast përshkallëzimi të mëtejshëm, duke theksuar se SHBA do të shënjestrojë objektiva që, sipas tij, mund të dëmtojnë rëndë kapacitetin e Iranit për t’u rikuperuar.