Presidenti i zgjedhur i Shteteve të Bashkuara, Donald Trump, ka nënshkruar një marrëveshje të rëndësishme me Shtëpinë e Bardhë për të lejuar fillimin zyrtar të tranzicionit të pushtetit, duke hapur rrugën që ekipi i tij të koordinohet me zyrtarët federalë përpara inaugurimit më 20 janar.
Kjo marrëveshje, e cila është një kërkesë e Ligjit për Tranzicionin Presidencial, i jep ekipit të Trump mundësinë për të bashkëpunuar me agjencitë qeveritare dhe për të pasur akses në të dhëna të ndjeshme. Në të njëjtën kohë, u jep agjencive federale autorizimin të ndajnë informacion thelbësor mbi operacionet qeveritare dhe kërcënimet që mund të përballojë vendi.
Megjithatë, një tjetër marrëveshje e nevojshme me Administratën e Shërbimeve të Përgjithshme (GSA), që do t’i garantonte ekipit të Trump akses në zyrat qeveritare, pajisjet teknologjike dhe postat elektronike, ende nuk është firmosur. Ky vendim është shoqëruar me debate, pasi marrëveshja kërkon që presidenti i zgjedhur të kufizojë donacionet në 5,000 dollarë dhe të bëjë transparente burimet financiare të tranzicionit.
Sipas burimeve nga Shtëpia e Bardhë, Presidenti Joe Biden ka bërë përpjekje publike dhe private për të nxitur Trump të nënshkruajë këtë marrëveshje, e cila ishte e detyrueshme që prej 1 tetorit. Ndërkohë, të dy ekipet kanë zhvilluar takime intensive, duke përfshirë një takim të fundit midis shefes së kabinetit të Trump, Susie Wiles, dhe homologut të saj të Biden, Jeff Zients, ku u diskutuan pengesat e fundit për të përfunduar procesin.
Përkushtimi i Biden
Zëdhënësja e Shtëpisë së Bardhë, Saloni Sharma, theksoi përkushtimin e Biden për një tranzicion të rregullt dhe të qetë të pushtetit. “Ashtu siç Presidenti Biden e ka thënë publikisht, tranzicioni duhet të jetë i qetë dhe në interes të vendit,” deklaroi ajo.
Pavarësisht kësaj, kufizimet aktuale kanë ndikuar në komunikimin mes këshilltarëve të sigurisë kombëtare të të dy palëve. Takimi i fundit mes Mike Walz, këshilltar i Trump për sigurinë kombëtare, dhe Jake Sullivan, homologu i tij në administratën Biden, është kufizuar vetëm në çështje jo kritike për shkak të mungesës së marrëveshjes për ndarjen e të dhënave sekrete.
Një tjetër pikë e rëndësishme në marrëveshje është transparenca etike. Sipas kushteve të vendosura, ekipi i Trump duhet të deklarojë se nuk ka konflikte interesi përpara se të marrë akses në informacione të klasifikuara federale. Sipas Wiles, kjo është thelbësore për të garantuar një tranzicion të pastër dhe etik.
Ekipi i Trump
Ndërkohë, ekipi i Trump ka refuzuar të përdorë zyrat e ofruara nga GSA pranë Shtëpisë së Bardhë, duke preferuar një qasje alternative për të siguruar të dhënat e nevojshme. Ky vendim nuk është pritur mirë nga administrata aktuale, e cila ka paralajmëruar për rrezikun e sigurisë kombëtare që mund të sjellë ky refuzim.
Pavarësisht pengesave, përgatitjet për tranzicion po vazhdojnë. Ekipi i Trump ka njoftuar se së shpejti do të publikojë listën e donatorëve dhe ka përsëritur se nuk do të pranojë donacione nga burime të huaja. Në të njëjtën kohë, po zhvillohen bisedime për nënshkrimin e një marrëveshjeje me Departamentin e Drejtësisë për të siguruar certifikatat e sigurisë dhe procesin e vetingut për anëtarët e ardhshëm të kabinetit.
Si hap i fundit, ekipi i Trump pritet të fillojë të marrë qasje në të dhëna të klasifikuara para 20 janarit, duke mundësuar një tranzicion më të rregullt dhe të përgatitur për sfidat që e presin administratën e re.
