Takimi Trump-Putin në Alaskë pritet të nisë në avionin e presidentit amerikan dhe të fokusohet tek lufta në Ukrainë.
Presidenti amerikan Donald Trump dhe homologu i tij rus, Vladimir Putin, do të zhvillojnë një takim të pazakontë, duke filluar bisedimet brenda avionit personal të Trump përpara se të ulen në bazën ushtarake Elmendorf-Richardson, më të madhen në Alaska. Ky është takimi i parë mes tyre gjatë mandatit të dytë të Trump, pas përballjes së fundit në vitin 2021.
Takimi është thirrur me kërkesë të Rusisë dhe ka në qendër agresionin rus në Ukrainë, i nisur në shkurt të vitit 2022 dhe ende në zhvillim. Bisedimet do të fillojnë në orën 21:00 dhe pritet të jenë një ndër përpjekjet më të drejtpërdrejta për t’i dhënë fund konfliktit.
Përveç çështjes së Ukrainës, në axhendë janë edhe tema që prekin marrëdhëniet bilaterale mes Moskës dhe Uashingtonit. Rusia shpreson të shmangë sanksionet e reja të paralajmëruara nga Trump, të sigurojë njohje mbi disa territore të pushtuara në Ukrainë dhe të hapë tregje të reja, përfshirë atë amerikan.
Nga ana tjetër, Trump kërkon një marrëveshje për armëpushim në Ukrainë, duke përmbushur një nga premtimet e tij elektorale për ta ndalur luftën “brenda 24 orëve”. Deri më tani, ky zotim ka mbetur i parealizuar, por takimi në Alaska shihet si një shans për të avancuar drejt një zgjidhjeje.
Për të dy liderët, ky takim përfaqëson jo vetëm një sfidë diplomatike, por edhe një test të gatishmërisë për të bërë kompromis në një konflikt që ka tronditur rendin ndërkombëtar. Rezultatet e tij mund të përcaktojnë ecurinë e marrëdhënieve SHBA-Rusi në vitet e ardhshme.
