Reshjet intensive në juglindje kanë rikthyer përmbytjet brenda tregut industrial të Pogradecit, ku tregtarët edhe këtë mëngjes u detyruan të hapin dyert me kova dhe lecka për të shpëtuar mallrat e lagura.
Reshjet e dendura të orëve të fundit kanë zbuluar edhe një herë problemin e vjetër të tregut industrial në Pogradec, një godinë që nuk ka asnjë mbrojtje nga uji dhe që për vite me radhë kthehet në vatër dëmesh për tregtarët. Në çdo ditë me shi apo borë, uji depërton pa asnjë pengesë brenda ndërtesës, duke dëmtuar produktet dhe duke vështirësuar punën e dhjetëra familjeve që jetojnë nga ky treg.
Që herët në mëngjes, tregtarët janë detyruar të nisin ditën me kova, lecka dhe mjete të tjera për të larguar ujin që kishte mbuluar ambientet e brendshme. Pavarësisht përpjekjeve, sasia e madhe e reshjeve ka bërë që situata të dalë sërish jashtë kontrollit.
Tregtarët shprehen se një pjesë e konsiderueshme e produkteve është lagur, duke rrezikuar të dëmtohet plotësisht. Ata thonë se kjo nuk është hera e parë që përballen me përmbytje të tilla, ndërsa shtojnë se askush nuk ka ndërhyrë për të zgjidhur problemin që prej vitesh i dëmton në çdo stinë të lagësht.
Sipas tyre, çdo reshje e fortë sjell të njëjtin stres dhe të njëjtat humbje ekonomike, ndërsa një zgjidhje e munguar nga institucionet po e kthen tregun në një strukturë të papërdorshme. Tregtarët kërkojnë një ndërhyrje urgjente për riparimin e çatisë dhe izolimin e godinës, duke paralajmëruar se në kushtet aktuale puna e tyre po kthehet në një aventurë të përditshme me humbje të vazhdueshme.
