Mikel Hoxha, Armando Gropa dhe Suard Onuzi u kapën jashtë vendit dhe do të përballen me drejtësinë shqiptare për akuza të rënda
Tre shtetas shqiptarë të shpallur në kërkim ndërkombëtar janë ekstraduar në Shqipëri nga Greqia, Belgjika dhe Serbia, pas një bashkëpunimi mes Interpol Tiranës dhe autoriteteve përkatëse në Athinë, Bruksel dhe Beograd.
I pari, Mikel Hoxha, i njohur edhe si Mikel Papa, u kap në Greqi. Ai ishte dënuar nga Gjykata e Beratit me 4 vjet burg për “Pastrimin e produkteve të veprës penale”. Sipas hetimeve, Hoxha kishte investuar në pasuri të paluajtshme dhe kishte transferuar shuma të mëdha te familjarët, të ardhura të përfituara nga shfrytëzimi për prostitucion, vepër për të cilën ishte dënuar më herët në Itali. Nga dënimi total, i kanë mbetur për të vuajtur 3 vjet e 9 muaj.
Rasti i dytë është Armando Gropa, 40 vjeç, i cili u kap në Belgjikë. Ai ishte dënuar nga Gjykata e Apelit Tiranë me 3 vjet e 4 muaj burg për “Kultivim të bimëve narkotike”. Në vitin 2021, Gropa kishte kultivuar 140 bimë të llojit Cannabis Sativa në tokën e tij në fshatin Grizë.
Suard Onuzi, i treti në listë, u arrestua në Serbi. Gjykata e Kukësit kishte caktuar ndaj tij masën e sigurisë “Arrest në burg” për veprën penale “Trafikimi i mjeteve motorike”. Onuzi akuzohet se ka trafikuar në Shqipëri një automjet të llojit “Mercedes Benz”, i cili ishte raportuar i vjedhur në Francë.
Autoritetet shqiptare vlerësojnë si të rëndësishëm bashkëpunimin ndërkombëtar në kapjen dhe ekstradimin e personave që i shmangen drejtësisë. Raste të tilla konfirmojnë angazhimin për luftën kundër krimit të organizuar dhe sigurimin e drejtësisë.
Këto ekstradime janë pjesë e një aksioni më të gjerë të organeve ligjzbatuese për të sjellë përpara drejtësisë të gjithë shtetasit shqiptarë që fshihen jashtë vendit dhe janë të përfshirë në vepra të rënda penale.
