Një sasi prej rreth 91 kilogramësh lëndë narkotike e dyshuar cannabis është sekuestruar në pikën kufitare të Kakavijës, teksa po transportohej drejt Greqisë.

Operacioni policor i koduar “Risku 1” u finalizua pas kontrolleve të shtuara bazuar në analizën e riskut dhe përdorimit të mjeteve logjistike bashkëkohore. Droga u gjet e fshehur në rreth 88 pako, në vende të krijuara posaçërisht në dyshemenë e një furgoni.

Në pranga kanë rënë drejtuesi i mjetit, K. A., 28 vjeç, dhe pasagjerja B. A., 25 vjeçe, të dy banues në Tiranë dhe bashkëshortë me njëri-tjetrin.

Sipas Policisë, furgoni iu nënshtrua fillimisht kontrollit në skaner dhe më pas kontrollit të detajuar në vijën e dytë, në dalje të Shqipërisë. Ndërkohë, hetimet vijojnë në bashkëpunim me Prokurorinë e Gjirokastrës për identifikimin e personave të tjerë që mund të jenë të përfshirë në këtë veprimtari kriminale.